ރާއްޖޭގެ މަލީ ޙާލަތު ހަމައަކަށް އެޅުވުމުގެ ގޮތުން ކުރިއަށް އޮތް ދެ އަހަރު ދުވަހަށް އިގްތިޞާދީ ސިޔާސަތު އިސްލާހުކުރުމުގެ ތެރެއިން ޚަރަދުކުޑަކުރުމުގެ ގޮތުން ރައީސުލްޖުމްހޫރިއްޔާ ޑރ މުޙައްމަދު މުއިއްޒު އެޅުއްވި ފިޔަވަޅުތަކުގެ ތެރޭގައި ހިމެނޭ ސިޔާސީ މުވައްޒަފުންގެ މުސާރައިން 10 އިންސައްތަ އުނިކުރުމަށް ނިންމެވި ނިންމެވުމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލް ވަރަށް ބޮޑަށް ފާޑު ވިދާޅުވެއްޖެއެވެ.
އެގޮތުން އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ، ރައީސްގެ މި ނިންމެވުމަކީ ސަރުކާރުން ޓެކްސް ނަގަމުން އަންނަ ރޭޓުތަކަށް ގެންނަން އުޅޭ ބަދަލުތަކުގެ ވާހަކަ އޮއްބައިލަން ކުރައްވާ ކަމެއް ކަމަށެވެ.
އެގޮތުން ފައްޔާޒުގެ ޓެކްސްގައި ވަނީ ޓެކްސްތައް ބޮޑުކޮށްފައި، ސިޔާސީ ވަޒީފާތަކުގެ މުސާރައިން 10 އިންސައްތަ އުނިކުރަން ނިންމި ނިންމުމަކީ “ދެބޯގެރިދުއްވުމެއް” ގޮތުގައި ސިފަކުރައްވައިފައެވެ.
https://x.com/faya_i/status/1849120455564955814?t=bKG59ftM4ypxjAYpCzyqZw&s=19
ހަމައެޔާއެކު ފާއިތުވި 11 މަސްދުވަހުގެ ތެރޭގައި 3000އި ގާތްކުރާ އަދަދަކަށް ސިޔާސީ ވަޒީފާ ސަރުކާރުން އުފައްދައިފައިވާކަން ފާހަގަކުރައްވައި ފައްޔާޒު ވިދާޅުވީ، ރައީސް ޑރ. މުއިއްޒު ރައްޔިތުންނަށް ވެވަޑައިގެންނެވި ވައުދާ އެއްގޮތަށް ސިޔާސީ ވަޒީފާތަކުގެ އަދަދު 700 އަށް ކުޑަކޮށްފައި ނޫނީ ރައްޔިތުންގެ އަތުން ނަގާ ޓެކްސް ބޮޑުކުރާ ވާހަކަ ދެއްކުމަކީ ލަދުވެތިކަމެއް ކަމަށެވެ.
ފައްޔާޒު މިފަދައިން ވިދާޅުވި ނަމަވެސް ސަރުކާރުގައި 3000 ސިޔާސީ މުވައްޒަފުން ތިބޭކަމަށް ދެކެވޭ ވާހަކަތައް ސަރުކާރުގެ ފަރާތުން ވަނީ ދޮގުކޮށްފައެވެ.
އަދި މާލީ ހާލަތު ރަނގަޅުކުރުމަށް އަޅާ ފިޔަވަޅެއްގެ ގޮތުން މި މަހުގެ 15ވަނަ ދުވަހު ރައީސް ވަނީ ސިޔާސީ މުވައްޒަފުންގެ ތެރެއިން 228 ފަރާތެއް މަޤާމުން ވަކިކުރައްވަން ނިންމަވައިފައެވެ.
