ކުރީގެ ރައީސް އިބްރާހީމް މުޙައްމަދު ޞާލިހުގެ ސަރުކާރުގައި ފެށި ބޯހިޔާވަހިކަމުގެ ބޮޑު މަޝްރޫޢުކަމުގައިވާ ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބުނު މީހުންނާއި ހުޅުމާލެއިން ގޯތި ލިބުނު މީހުންގެ ތެރެއިން ގުޅީފަޅަށް ގޯތި ބަދަލުކުރި މީހުންގެ ގުރުއަތުލުން އަންނަ އަންގާރަ ދުވަހު ބާއްވާ ގޮތަށް ހަމަޖައްސައިފިއެވެ.
މިކަން ހާމަކޮށް ހައުސިން މިނިސްޓްރީން ގެޒެޓްގައި ކުރި އިއުލާނެއްގައި ބުނެފައިވަނީ، އަލަށް އެކުލަވާލައި ޝާޢިޢުކުރި ‘ގުޅިފަޅު ލޭންޑް ޔޫސް ޕްލޭން’ އާއެކު ކުރިން ބިންވެރިޔާ ސްކީމުގެ ދަށުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަންތަކަށް ބަދަލުތަކެއް އައިސްފައިވާކަމަށެވެ.
ވުމާއެކު، ގޯތިތަކުގެ ވެރިފަރާތްތަކާއި، މިހާތަނަށް ގުޅީފަޅުން ގޯތި ހަވާލުކޮށްފައިވާ ފަރާތްތަކުގެ އިތުރުން، ގިރާވަޅު ފަޅުން ލިބުނު ގޯތިތައް ގުޅިފަޅަށް ބަދަލު ކުރަން އެދުނު ފަރާތްތަކުގެ ތެރެއިން ގުރުނަގައިގެން ގުޅިފަޅަށް ބަދަލުވެފައިވާ ފަރާތްތަކުގެ ގުރުނެގުން އަންނަ އަންގާރަ ދުވަހު އަލުން ބޭއްވުމަށް ހަމަޖެހިފައިވާކަމުގައި އެ މިނިސްޓްރީގެ އިއުލާނުގައި ބުނެފައިވެއެވެ.
އެގޮތުން ގުޅި ފަޅުން ދޫކުރުމަށް ހަމަޖެހިފައިވާ ގޯތިތަކުގެ ބޮޑު މިންތަކަކީ:
- 1250 އަކަފޫޓުގެ 669 ގޯތި
- 1650 އަކަފޫޓުގެ 1234 ގޯތި
- 2050 އަކަފޫޓުގެ 916 ގޯތި
- 2450 އަކަފޫޓުގެ 473 ގޯތި
- 2850 އަކަފޫޓުގެ 158 ގޯތި
- 3250 އަކަފޫޓުގެ 49 ގޯތި
- 3650 އަކަފޫޓުގެ 21 ގޯތި
މި ގޯތިތަކުގެ ގުރުއަތުލުން ކުރިއަށް ގެންދިއުމަށް ހަމަޖެހިފައިވަނީ، ހައުސިންގް މިނިސްޓްރީން ގޯތިތަކުގެ ބޮޑުމިންތަކާއެކު ގެޒެޓްގައި ޝާޢިއު ކުރި ލިސްޓުގައިވާ ތަރުތީބުން ކަމުގައި ހައުސިންގ މިނިސްޓްރީން ބުނެއެވެ.
އަދި މި ގުރުއަތުލުން ފެށުމަށް ހަމަޖެހިފައިވަނީ އަންގާރަ ދުވަހު ހެނދުނު 09:00 ގައި ދަރުބާރުގެ ރަންނަ ބަނޑޭރި މާލަމުގައިކަމަށާއި މި ގުރުލުމުގައި ގޯތި ލިބޭ ފަރާތުގެ ބަދަލުގައި އެހެން ފަރާތެއް ބައިވެރިވާނަމަ، ބިން ލިބޭ ފަރާތުގެ އިއުތިރާޒެއް ނެތް ކަމުގެ ލިޔުމާއި އައިޑީކާޑުގެ ކޮޕީ ހިފައިގެން ގުރުލުމަށް ހާޒިރުވުމަށް މިނިސްޓްރީގެ އިއުލާނުގައި ވަނީ އެދިފައެވެ.
މީގެ އިތުރުން އެ މިނިސްޓްރީން ބުނެފައިވަނީ، ގުރުއަތުން ލިބޭ ގޯތިތަކުގެ ރަޖިސްޓްރީއާއި އެއްބަސްވުމާއި ގުޅުންހުރި މައުލޫމާތުތައް ފަހުން ހިއްސާކުރާނެކަމަށެވެ.
ނިމިދިޔަ ސަރުކާރުން ފެށި ބިންވެރިޔާ ސްކީމުގެ ގޯތިތައް ދިނުން ލަސްވެ މި މައްސަލަ މިހާރު ވެފައިވަނީ ހައްސާސް މައްސަލައަކަށެވެ. އެގޮތުން މި ގޯތިތައް ދިނުން އަވަސްކުރުމަށް ގޮވާލައި ގިނަ ބަޔަކު އަޑު އުފުލައި މުޒާހަރާވެސް ކުރަމުން އަންނަކަން ފާހަގަކޮށްލެވެއެވެ.
ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ވަނީ ނިންމައިފައެވެ. އެ ސްކީމްގެ ދަށުން ގޯތި ދޫކުރަނީ ގިރާވަރުފަޅާއި ގުޅިފަޅުގެ އިތުރުން ހުޅުމާލެ ހިއްކައިގެންނެވެ.
