ރާއްޖެއަށް ތަކުރާރުކޮށް މަސްތުވާތަކެތި އެތެރެކުރުން މައްސަލައިގައި މީހަކު ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ، މީގެ ކުރިންވެސް ރާއްޖެއަށް މަސްތުވާތަކެތި އެތެރެކުރަން އުޅުނު މައްސަލައެއްގައި ހައްޔަރުކޮށްފައިވާ، އައްޑޫ ހިތަދޫ، ވެހެތާނުގޭ އުމުރުން 65 އަހަރުގެ އަބްދުﷲ ސޯދިގެވެ.
ރާއްޖެއަށް މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި މިދިޔަ މަހުވެސް އޭނާ ހައްޔަރުކުރިއެވެ. އޭނާގެ އަތުން އަތުލައިގަނެވުނީ 3.49 ގްރާމުގެ ހެރޮއިންއެވެ. އެހެން ނަމަވެސް ފަހުން ވަނީ އޭނާ ދޫކޮށްލައިފައެވެ.
މިފަހަރު ސޯދިގު ހައްޔަރުކޮށްފައިވަނީ އޭނާ ރާއްޖެއިން ބޭރުން އައި އިރު ގެނައި ލަގެޖްގައި އޮތް ވާސްއިން ފެނުނު މަސްތުވާތަކެތި ކަމަށް ޝައްކު ކުރެވޭ 4 ރަބަރު ޕެކެޓުން ފެނުނު ތަކެތި މަސްތުވާތަކެތީގެ ބާވަތެއް ކަމުގައިވާ ހެރޮއިންއަށް ފައްސިވެފައިވާތީއެވެ.
މީގެ އިތުރުން އޭނާގެ ކުދަކަމުދާ ތަކެތި ވެސް ވަނީ މަސްތުވާތަކެއްޗަށް ފައްސިވެފައެވެ.
ސޯދިގުގެ އަތުން ފެނުނު މަސްތުވާތަކެތީގެ ބަރުދަން 270 ގްރާމަށް އަރައެވެ.
މި މައްސަލައިގައި އޭނާގެ ބަންދާއި މެދު ގޮތެއް ނިންމަން މިދިޔަ ބުރާސްފަތި ދުވަހު ކުރިމިނަލް ކޯޓަށް ހާޒިރުކުރުމުން ކޯޓުން ވަނީ އޭނާ 15 ދުވަހަށް ބަންދު ކުރުމަށް އަމުރުކޮށްފައެވެ.
އެ ކޯޓުގެ އަމުރުގައި ވާގޮތުން މި މައްސަލައާ ގުޅިގެން ހައްޔަރުކޮށް ސުވާލުކުރުމުން ސޯދިގު ޖަވާބު ދީފައިވަނީ އެކިފަހަރު އެކި ގޮތަށެވެ.
ހެރޮއިން ފަދަ ޑައިމޯފިންގެ ބާވަތްތަކުގެ ހަތަރު ގްރާމަށް ވުރެ ގިނައިން މީހެއްގެ އަތުން ފެނިއްޖެނަމަ ބެލެވޭނީ އެއީ ޓްރެފިކް ކުރަން ގެންގުޅުނު ތަކެތި ކަމަށެވެ. އެ ކުށުގެ އަދަބަކީ 25 އަހަރަށް ޖަލަށްލުމެވެ.
