ގިނަ އަދަދެއްގެ ޑްރަގާއެކު 19 އަހަރުގެ ޒުވާނަކު ހައްޔަރުކޮށްފިއެވެ.
މިމައްސަލައިގައި ފުލުހުން ހައްޔަރުކޮށްފައި ވަނީ ކ. ކާށިދޫ، އަންދަލީބުގެ، އުމުރުން 19 އަހަރުގެ މުހައްމަދު މައިހާން ފަޔާޒެވެ.
ފުލުހުން އޭނާ ހައްޔަރުކޮށްފައި ވަނީ ކިލޯއެއްގެ ޑްރަގާއެކު މާލޭގެ އެޕާޓްމެންޓަކުންނެވެ.
އޭނާގެ ބަންދާއިމެދު ގޮތެއް ކަނޑައެޅުމަށް ކޯޓަށް ހާޒިރު ކުރުމުން ކްރިމިނަލް ކޯޓުން ވަނީ އޭނާގެ ބަންދަށް 10 ދުވަސް ޖަހާފައެވެ.
ކްރިމިނަލް ކޯޓުން ނެރެފައިވާ ބަންދު އަމުރުގައި ބަޔާންކޮށްފައިވާ ގޮތުގައި އޭނާ ދިރިއުޅޭ އެޕާޓުމަންޓުން ކިލޯއެއްހާ މަސްތުވާތަކެތި ކަމަށް ބެލެވޭ އެއްޗިއްސާއި 64،000 ރުފިޔާ އާއި މަސްތުވާތަކެތި ބަންދުކުރުމަށް ބޭނުންކުރާ އާލާތްތައް ވެސް ފެނިފައިވާކަމަށެވެ.
މީގެއިތުރުން، ސީންގައި އޭނާ ބައެއް ހެކި ނައްތާލަން މަސައްކަތް ކޮށްފައިވާ ކަމަށާއި، އޭނާގެ ކުޑަކަމުދާތަކެތި މަސްތުވާތަކެއްޗަށް ޕޮޒިޓިވް ވެފައިވާ ކަމަށްވެސް ކޯޓު އަމުރުގައި ބުނެފައިވެއެވެ.
ކޯޓުގައި އޭނާ ބުނެފައިވާ ގޮތުން އޭނާ އެގެއަށް ދިރިއުޅުން ބަދަލުކުރީ މީގެ ތިން ދުވަސް ކުރިންނެވެ. އަދި އެ އެޕާޓްމެންޓުން ފެނުނު ތަކެއްޗާއި އޭނާއާއި އެއްވެސް ގުޅުމެއް ނުވާނެ ކަމަށް ވެސް އޭނާ ބުނެފައިވެއެވެ.
