އިސްރާއީލުގެ ހަމަލާތަކުން ޙާލުގައި ޖެހިފައިވާ ފަލަސްޠީނުގެ ރައްޔިތުންނަށް އެހީތެރިވުމުގެ ގޮތުން “ފަލަސްތީނާއެކު ދިވެހިން” ގެ ނަމުގައި ޕީއެސްއެމުން އިސްނަގައިގެން މިދިޔަ ޖޫން މަހު ބޭއްވި ތެލެތޯނުން ލިބުނު ފައިސާ ޔުނައިޓެޑް ނޭޝަންސް ރިލީފް އެންޑް ވާރކްސް އޭޖެންސީ ފޯރ ޕަލަސްތީނިއަން ރެފިއުޖީޒް (އަންރުވާ) އަށް ފޮނުވައި، އޭގެ ތަފްސީލުތައް އާންމުކޮށްފިއެވެ.
އެގޮތުން ފިނޭންސް މިނިސްޓްރީން ނެރުނު ބަޔާނެއްގައި ބުނެފައިވަނީ، މި ފައިސާ 2024 އޯގަސްޓް 20 ވަނަ ދުވަހު ޖަމާކޮށްފައިވާ ކަމަށެވެ. އެގޮތުން އެ ބަޔާނާއެކު އެ މިނިސްޓްރީން ވަނީ، ރާއްޖޭގެ މަރުކަޒީ ބޭންކުން އަންރުވާއަށް ފައިސާ ޖަމާކުރިކަމުގެ ‘ޑެބިޓު އެޑްވައިޒު’ ގެ ކޮޕީއާއި “އަންރުވާ ފޯރ ޕަލަސްތީން” އެކައުންޓަށް ރާއްޖެއިން ފޮނުވި ފައިސާ ލިބިފައިވާކަން ކަށަވަރުކޮށްދީ ޖޭޕީމޯގަން ބޭންކުން އިޝޫ ކޮށްފައިވާ ޓްރާންސެކްޝަން ތަފްސީލުވެސް އާންމުކޮށްފައެވެ.
ސިދާ ރައީސް ޑރ މުހައްމަދު މުޢިއްޒުގެ އިރުޝާދުގެ ދަށުން ކުރިއަށް ގެންދިޔަ މި ތެލެތޯންއިން ގާތްގަނޑަކަށް 48 ގަޑިއިރުތެރޭގައި ވަނީ، 1,248,826.56ރ ހޯދައިފައެވެ. އަދި މި އަދަދު ވަނީ އޮޑިޓް ފާމްއެއް ކަމުގައިވާ ކްރޯވ މޯލްޑިވްސް އެލްއެލްޕީން ކަށަވަރުވެސް ކޮށްފައެވެ.
އެގޮތުން ފިނޭންސް މިނިސްޓްރީގެ ބަޔާނުގައި ބުނެފައިވަނީ، މިފަދަ ބޮޑު އަދަދެއްގެ ފައިސާ ފަލަސްތީނުގެ ރައްޔިތުންނަށްޓަކައި ދިވެހި ރައްޔިތުން ހަދިޔާކޮށްފައިވާކަމީ ފަލަސްތީނުގެ މިނިވަންކަމަށް ރާއްޖެއިން ކުރާ ތާޢީދާއި, އަބަދުވެސް, އަދި ވަކީން ހާއްސަކޮށް މިފަދަ ދަތި އުނދަގޫ ދަނޑިވަޅެއްގައި, އެ ގައުމާއި އެ ގައުމުގެ ރައްޔިތުންނާއެކު ސާބިތުކަމާއެކު ދިވެހިން ތިބި ކަމުގެ އަލިގަދަ ހެއްކެއް ކަމަށެވެ.
މީގެ އިތުރުން އެ މިނިސްޓްރީން ވަނީ، ދިވެހި ސަރުކާރުން މިހާރު އަންނަނީ ދިވެހި ރައްޔިތުން ހަދިޔާ ކުރި ފައިސާ ހަރަދުކުރާނެ ކުރު އަދި ދިގު މުއްދަތުގެ ޕްރޮގްރާމްތަކާއި ޕްރޮޖެކްޓުތަކާ ގުޅޭގޮތުން އަންރުވާއާއެކު މަޝްވަރާކުރަމުން ކަމުގައިވެސް އެ ބަޔާނުގައި ބުނެފައެވެ.
