ކުރީގެ ރައީސް އިބްރާހީމް މުޙައްމަދު ޞާލިހްގެ ސަރުކާރުގައި ކުރިއަށް ގެންދިޔަ ގެދޮރުވެރިޔާ ސްކީމުގެ ދަށުން ފުރަތަމަ ދޫކުރި 4000 ފްލެޓަށް ޝަރުތުހަމަވާ ޙައްޤުވެރިންގެ ނަންތައް އަންނަ ނޮވެމްބަރު މަހުގެ މެދު ތެރޭގައި އިއުލާނުކުރުމުގެ މަސައްކަތްތައް ފަށައިފިއެވެ.
މިކަން ހާމަކޮށް ހައުސިންގް މިނިސްޓްރީން ނެރުނު ބަޔާނެއްގައި ބުނެފައިވަނީ، މިވަގުތު ކުރިއަށް ދަނީ އެ މަޝްރޫޢުގެ ދަށުން ފްލެޓަށް އެދި ހުށަހަޅައިފައިވާ ހުރިހާ ފޯމުތަކެއް ރި-އިވެލިއުއޭޓް ކުރުމުގެ މަސައްކަތް ކަމަށެވެ.
ގެދޮރުވެރިޔާގެ ފްލެޓްތަކުގެ ފޯމުތައް ް ރި-އިވެލިއުއޭޓް ކުރަން ފެށީ، މިދިޔަ ސަރުކާރުން ފެލްޓް ލިސްޓް އާންމުކުރުމާއެކު، އެ ލިސްޓް އެކުލަވާލުމުގައި މައްސަލަތައް ހުރިކަމަށްބުނެ ގިނަ ބައެއްގެ ޝަކުވާތައް އިތުރުވުމާއި ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން ވަނީ އެކަން ހުއްޓުވާފައެވެ.
އަދި އެ ކޮމިޝަނުން އެ ލިސްޓް މުރާޖަޢާކޮށް ބެލުމަށްފަހު ފްލެޓް ލިބުނު 60 އިންސައްތަ މީހުންނަކީ ފްލެޓަށް ޝަރުތު ހަމަނުވާމީހުންކަމަށް ވަނީ ކަނޑައަޅައިފައެވެ. އެހެންނަމަވެސް، ފްލެޓަށް ޝަރުތު ހަމަވާ ކަމަށް ރަނގަޅަށް ޕޮއިންޓު ދީފައިވާ މީހުންނަށް ފްލެޓު ދޭން ފަށަން އޭސީސީން ވަނީ ހައުސިންގް މިނިސްޓަރީއަށް ހުއްދަ ދީފައެވެ.
ހައުސިން މިނިސްޓްރީން ނެރުނު ބަޔާނުގައި ބުނެފައިވަނީ، އެސީސީގެ އިތުރުން ޑރ. މުހައްމަދު މުއިއްޒުގެ ލަފާފުޅުގެ މަތިން އެކުަލަވާލި “ހައުސިންގ އެޑްވައިޒަރީ ކޮމެޓީ”އާއި މާލޭ ސިޓީ ކައުންސިލުން އެކުލަވާލި “ހައުސިންގ ކޮންސަލްޓިވް ކޮމެޓީ”ން ވެސް މި ސްކީމްގެ ދާއިމީ ލިސްޓް އެކުލަވާލާފައިވާ ގޮތް ރަނގަޅުކަމަށް ކަނޑައަޅައިފައިވާކަމަށެވެ.
އެގޮތުން މިވަގުތު ކުރިއަށް ދާ ރި-އިވެލިއުއޭޝަން މަރުހަލާއަށް އިތުރު ވަގުތު ބޭނުންވާތީ، މި އަހަރުގެ ނޮވެމްބަރު މަހުގެ ދެވަނަ ހަފްތާގެ ނިޔަލަށް ވަގުތީ ލިސްޓް އާއްމު ކުރުމުގެ މަސައްކަތްތައް ހައުސިންގް މިނިސްޓްރީން ކުރަމުން އަންނަކަމުގައި އެ ވުޒާރާއިން ވަނީ ބުނެފައެވެ.
“ގެދޮރުވެރިޔާ” ސްކީމްގެ ދަށުން ދޫކުރަން ނިންމާފައިވާ 4،000 ފްލެޓް އަޅަނީ އިންޑިއާގެ އެގްޒިމް ބޭންކުން 227 މިލިއަން ޑޮލަރުގެ ސޮވެރިން ގެރެންޓީއެއް ދިވެހި ސަރުކާރަށް ދީގެންނެވެ.
މިއީ އިންޑިއާގެ ޖޭއެމްސީ ޕްރޮޖެކްޓްސް ލިމިޓެޑާއި ނެޝަނަލް ބިލްޑިންސް ކޮންސްޓްރަކްޝަން ކޮމްޕެނީ (އެންބީސީސީ) އިން ކުރިއަށްގެންދާ މަޝްރޫއެކެވެ.
ގެދޮރުވެރިޔާ ސްކީމުގެ ދަށުން 15،000 އަށްވުރެ ގިނަ ފަރާތުންވަނީ ފުލެޓު ހޯދުމަށް ހުށަހަޅާފައެވެ. އެއިން 9،000 މީހުން ފުލެޓަށް ޝަރުތު ފުރިހަމަވާކަމަށް އެމްޑީޕީ ސަރުކާރުގައި ނިންމިއެވެ. އަދި ފަހި ދިރިއުޅުން ކޯޕަރޭޝަނުން އަޅަމުންދާ 4،000 ފުލެޓުގެ ހައްގުވެރިންގެ ލިސްޓެއްވެސް އެއިރު އާންމުކުރިއެވެ.
