އެންޓިކޮރަޕްޝަން ކޮމިޝަން (އޭސީސީ) އިން އެ ކޮމިޝަނާއި މަތިކުރެވޭ ޒިންމާތައް ފުރިހަމައަށް އަދާނުކުރާކަމުގައި ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް މިއަދު ވިދާޅުވެއްޖެއެވެ.
އޭސީސީއާއި އިލެކްޝަންސް ކޮމިޝަން (އީސީ)ގެ ވެރިން އައްޔަން ކުރުމުގެ ބާރު ސީދާ ރައީސުލްޖުމްހޫރިއްޔާއަށް ދިނުމަށް ސަރުކާރުގެ ފަރާތުން ހުށަހެޅި ބިލަށް މިއަދު ރައްޔިތުންގެ މަޖިލިހުގައި ކުރިއަށް ދާ ބަހުސްގައި ވާހަކަފަޅު ދައްކަވަމުން ނާޒިމް ވިދާޅުވީ، ފެންނަމުން ދަނީ ރާއްޖޭގައި ހިނގާ ބޮޑެތި ކޮރަޕްޝަންގެ މައްސަލަތައް ނުބެލި ދޫވެގެންދާތަން ކަމަށާއި ދާތަން އެ މަންޒަރު ބަލަން ނުތިބެވޭނެ ކަމަށެވެ.
އެގޮތުން މުއައްސަސާތަކުގެ ވެރިން އައްޔަން ކުރުމުގެ ބާރު، ރައީސުލްޖުމްހޫރިއްޔާއަށް ދިނުމަކީ އަކަށް ކުރާ ކަމެއް ނޫންކަމަށާއި ފާއިތުވި ސަރުކާރުގައި ސިވިލް ސާވިސް ކޮމިޝަންގެ ރައީސް އައްޔަނުކުރުމުގެ ބަރުވެސް ރައީސުލްޖުމްހޫރިއްޔާއަށް ދެއްވައިފައިވާކަމަށެވެ.
އެގޮތުން އެންޓިކޮރަޕްޝަން ކޮމިޝަނަކީ ހިނގަންވާގޮތަށް ހިނގާތަނެއް ކަމަށް ޤަބޫލުނުކުރައްވާކަން ފާހަގަކުރައްވައި ނާޒިމް ވިދާޅުވީ، އިސްލާހު ކުރެވިގެންދާ ޤާނޫނާއެކު އެ ކޮމިޝަންގެ ރައީސް އައްޔަންކުރުމާއި ވަކި ކުރުން ކުރިއަށް ގެންދާނީ ސަރުކާރުން ކަމަށާއި އޭރުން އެ ކޮމިޝަންތަކަށް ފާޑުކިޔުމުގެ ފުރުސަތު ނޯންނާނެކަމަށެވެ.
އަޅުގަނޑު ގަބޫލުކުރާ ގޮތުގައި ރާއްޖޭގެ އެއްވެސް ރައްޔިތަކު ނެތް އެންޓި ކޮރަޕްޝަން ބޯޑު ހިނގަންވާ ގޮތަށް ހިނގާކަމަށް، ޕާފޯމްކުރަންވާ ގޮތަށް ޕާފޯމްކުރާ، ކޮރަޕްޝަންގެ މައްސަލަތައް ހައްލުކުރެވޭ ބަޔަކަށް އޭސީސީ ވާކަމަށް ގަބޫލުކުރާ – ނާޒިމް
އެގޮތުން އެންޓިކޮރަޕްޝަން ކޮމިޝަނުގެ ވެރިންގެ ގޮތުގައި މިހާރު ތިއްބެވި ބޭފުޅުންނަކީ އެއްވެސް ޕްރޮފެޝަނަލިޒަމް އެއް ނެތް ބޭފުޅުންތަކެއްގެ ގޮތުގައި ފާހަގަކުރައްވައި ނާޒިމް ވިދާޅުވީ، ކޮރަޕްޝަންގެ ބޮޑެތި މައްސަލަތަކުގެ ތެރޭގައި ހިމެނޭ، އެފްއޭމްގެ ބޮޑު ޚިޔާނާތުގެ މައްސަލައިގައިވެސް އެ ކޮމިޝަނަށް އެއްވެސް ފިޔަވަޅެއް އެޅިފައި ނުވާކަމަށެވެ.
އީސީގެ ޤާނޫނަށް ބަދަލުގެންނަން ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފެވެ. އޭސީސީގެ ޤާނޫނު ބަދަލުކުރަން ހުށަހެޅުއްވީ ފެލިދޫ ދާއިރާގެ މެންބަރު އާދަމް ޒާހިރެވެ.
މި ދެ ބިލުގައި ވާގޮތުން، އޭސީސީ ނުވަތަ އީސީއަށް ރައީސަކާއި ނައިބު ރައީސެއް އައްޔަންކުރަން ކޮމިޝަންގެ މެންބަރުންގެ ތެރެއިން މެންބަރެއްގެ ނަން މަޖިލީހަށް ހުށަހަޅާނީ ރައީސުލްޖުމްހޫރިއްޔާއެވެ. މި ނަން ފާސްކުރަން މަޖިލީހުގެ ޖަލްސާއެއް ބާއްވަން ޖެހެއެވެ. އަދި އެ މަޤާމުތަކުން އިސްތިއުފާދޭން ހުށަހަޅަން ޖެހޭނީ ވެސް ރައީސުލްޖުމްހޫރިއްޔާއަށް ކަމަށް އިސްލާހުގައި ބަޔާންކޮށްފައިވެއެވެ.
