ޤަވާއިދާއި ޚިލާފަށް ރާއްޖެ އެތެރެވެ ރާއްޖޭގައި މައްސައްކަތް ކުރަމުންދާ ބިދޭސީންނާއި ޤަވާއިދާއި ޚިލާފު މަސައްކަތްތައް ރާއްޖޭގައި ކުރަމުންދާ ބިދޭސީންގެ މައްސަލަ ޙައްލުކުރުމުގެ ގޮތުން ސަރުކާރާއި އިމިގްރޭޝަން ގުޅިގެން ކުރަމުން އަންނަ މަސައްކަތްތަކުގެ ތެރެއިން، ނުޤަވާއިދުން އުޅެމުން ދިޔަ ބިދޭސީންތަކެއް އަނެއްކާވެސް މާލެއިން ހައްޔަރުކޮށްފިއެވެ.
އެގޮތުން އިމިގްރޭޝަނުން ކުރިއަށް ގެންދާ ރެއިޑްތަކުގެ ތެރެއިން އިއްޔެ މާލޭގެ 3 ތަނެއް ބަލައި ފާސްކޮށް، 5 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފައިވާކަމަށް އެ އިދާރާއިން ވަނީ ބުނެފައެވެ.
https://x.com/ImmigrationMV/status/1850864026634633597
އިމިގްރޭޝަންގެ ބެލުމުގެ ދަށަށް ގެނެވުނު ބިދޭސީންގެ ތެރޭގައި ހިމެނެނީ، 4 ބިދޭސީ ފިރިހެނަކާއި 1 އަންހެނަކުކަމަށްވެސް އިމިގްރޭޝަނުން ހާމަކުރެއެވެ.
އިމިގްރޭޝަނުން މި އޮޕަރޭޝަން ހިންގަނީ ދީފައިވާ ހުއްދައިގެ ބޭރުން ރާއްޖޭގައި އުޅެމުން އަންނަ ބިދޭސީންނާއި ޤަވާއިދާ ޚިލާފަށް ކުދި އަދި މެދު ފަންތީގެ ވިޔަފާރި ކުރަމުން އަންނަ ބިދޭސީން ދެނެގަނެ، އިމިގްރޭޝަން ޤާނޫނުގެ ދަށުން ފިޔަވަޅު އެޅުމަށެވެ.
އެގޮތުން މި އޮޕަރޭޝަންގެ ތެރެއިން ފާއިތުވި އަހަރެއްހާ ދުވަހުގެ ތެރޭގައި 4000ށް ވުރެ ގިނަ ބިދޭސީން އަނބުރާ ޤައުމަށް ފޮނުވާލެވިފައިވާކަމަށާއި ސަރުކާރުގެ އަމާޒަކީ އެއް އަހަރު ދުވަހުގެ ތެރޭގައި 5000 ބިދޭސީން ޤައުމަށް ފޮނުވާލުން ކަމުގައި ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްޢާން ވަހީދު މި ފަހުން ވަނީ ވިދާޅުވެފައެވެ.
އަދި މި އަމާޒަށް ވާޞިލްވެވޭނެ ކަމުގެ ޔަޤީންކަން އެބަ އޮތްކަމުގައިވެސް އެބޭފުޅާ ވިދާޅުވިއެވެ.
