ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަހްމަދު ސައީދު ރާއްޖެއިން ބޭރުގައި އުޅުއްވުމަށްފަހު ރާއްޖެ ވަޑައިގަތުމާއެކު އެބޭފުޅާގެ ޕާސްޕޯޓް ހިފަހައްޓައިފިއެވެ.
އެންޓި ކޮރަޕްޝަން ކޮމިޝަނުން ބަލަމުން ގެންދާ ސައީދުގެ ކޮރަޕްޝަންގެ މައްސަލައަކާއި ގުޅިގެން އެ ކޮމިޝަނަށް ހާޒިރުކޮށް ސައީދާއި ސުވާލުކުރަމުން ގެންދަނިކޮށް، ދުވަސްކޮޅެއް ފަހުން އާލާސްކަންފުޅެއްގައި އުޅުއްވާކަމަށް ވިދާޅުވެ ވަނީ ރާއްޖެއިން ބޭރަށް ފުރާވަޑައިގެންފައެވެ.
އެހެން ނަމަވެސް އެނގިފައިވާ ގޮތުގައި ރާއްޖެއިން ބޭރުގައި އުޅުއްވުމަށްފަހު އެނބުރި ރާއްޖެ ވަޑައިގަތުމާއެކު އެބޭފުޅާގެ ޕާސްޕޯޓް ހިފަހައްޓައިފައި ވަނީ މިމަހުގެ ނުވަ ވަނަ ދުވަހުއެވެ.
އޭސީސީން ބަލަމުން ގެންދާ މައްސަލަތަކުގެ ތެރޭގައި ފެނަކައިން އެކި ފަރާތްތަކާ ކޮންޓްރެކްޓުކުރި މަޝްރޫއުތަކުގެ ތެރެއިން މަޝްރޫއުގެ އަސްލު އަގަށް ވުރެ ބޮޑު އަގުގައި އެކި ކުންފުނިތަކާ ހަވާލު ކޮށްފައި ހުރި މަޝްރޫއުތަކާއި ޕްރޮކިއުމެންޓު އުސޫލުތަކާ ޚިލާފަށް ސައީދުގެ އެމްޑީކަމުގައި ހިންގާފައިވާ ގިނަ މައްސަލަތަކެއް ހިމެނެއެވެ.
އެގޮތުން ސައީދާއި ގުޅޭ ކޮރަޕްޝަނުގެ 25 މައްސަލައެއް އޭސީސީއަށް ހުށަހަޅާފައިވާ ކަމަށް، އެ ކުންފުނީގެ މިހާރުގެ އެމްޑީ، މުއާޒް މުހައްމަދު ރަޝީދުވަނީ މިދިޔަ އޮގަސްޓުމަހު ވިދާޅުވެފައެވެ.
