ރާއްޖެއިން ފުރަތަމަ ފަހަރަށް ދިވެއްސަކު މިސް ޔުނިވާސް މުބާރާތުގައި ބައިވެރިވާ ގޮތަށް ހަމަޖެހިއްޖެއެވެ.
މިމުބާރާތުގައި ރާއްޖެ ތަމްސީލު ކުރުމަށް ހަމަޖެހިފައި ވަނީ އުމުރުން 21 އަހަރުގެ މަރިޔަމް ޝައިނާ ނަސީމެވެ.
މެކްސިކޯއިން އިންޑިއާއަށް ކަނޑައަޅުއްވާފައި ހުންނަވާ ސަފީރު ޑިއޭގޯ ޕެރެޒް ވަނީ ޝައިނައާ ބައްދަލު ކުރައްވައި މިއަދު އެކްސްގައި ކުރި ޕޯސްޓެއްގައި ވިދާޅުވީ، މިސް ޔުނިވާސްގައި ވާދަކުރުމަށް ޝައިނާ އަށް ވިސާ ހަމަޖައްސައިދީފައިވާ ކަމަށާއި މިއީ މިމުބާރާތުގައި ރާއްޖެ އިން ބައިވެރިވާ ފުރަތަމަ ފަހަރު ކަމަށެވެ.
މިއަހަރުގެ މިސް ޔުނިވާސް މުބާރާތް ބޭއްވުމަށް ހަމަޖެހިފައި ވަނީ މެކްސިކޯގައި އަންނަ މަހުގެ 14 ގައެވެ. އަދި ފައިނަލް ޝޯ ބޭއްވަނީ އޭގެ 2 ދުވަސް ފަހުންނެވެ.
މިއަހަރުގެ މުބާރާތުގައި ޖުމްލަ 130 ޤައުމަކުން ބައިވެރިވާއިރު، މިއީ މިސް ޔުނިވާސްގެ 73 ވަނަ މުބާރާތެވެ.
ޝައިނާ ވަނީ 2022 ވަނަ އަހަރު ބޭއްވި ޓޮޕް މޮޑެލް މޯލްޑިވްސްގައި ބައިވެރިވެ، އެ މުބާރާތް ކާމިޔާބުކޮށް މިދިޔަ އަހަރު މިސްރުގައި ބޭއްވި ޓޮޕް މޮޑެލް އޮފް ދަ ވޯލްޑް މުބާރާތުގައި ވެސް ރާއްޖެ ތަމްސީލްކޮށްފައެވެ.
