ސަރުކާރުގެ އެކި ސިޔާސީ މަޤާމުތަކުގައި ތިބި ޖުމުލަ 248 މުވައްޒަފަކު މިހާތަނަށް ވަޒީފާއިން ވަކިކޮށްފައިވާ ކަމުގައި ސަރުކާރުގެ ހާމަކޮށްފިއެވެ.
ރައީސް އޮފީހުގެ ތަރުޖަމާނު، ހީނާ ވަލީދު ކުރެއްވި އެކްސް ޕޯސްޓެއްގައި ވިދާޅުވެފައިވަނީ، މި ފިޔަވަޅަކީ ސަރުކާރުން އެކުލަވާލާފައިވާ އިކޮނަމިކް ރިފޯމް އެޖެންޑާގެ ދަށުން އެޅި ފިޔަވަޅެެއް ކަމަށެވެ.
އެގޮތުން މިހާތަނަށް ޖުމުލަ 248 ސިޔާސީ މުވައްޒަފުން ވަޒީފާއިން ވަކިކޮށްފައި ވާއިރު
ސިޔާސީ މުވައްޒަފުންގެ މަސައްކަތުގެ ފެންވަރު ބަލައި، ކުރުންތެރިކަން އިތުރު ކުރުމަށް ސިޔާސީ މުވައްޒަފުންގެ ޕަރފޯމަންސް ބަލާނެ ނިޒާމެއް ޤާއިމް ކުރުމަށް ވަޒީރުންގެ މަޖިލީހުން ނިންމާފައިވާކަމަށް ހީނާ ވިދާޅުވިއެވެ.
އަދި މި ނިޒާމަށް ވަރަށް އަވަހަށް ޢަމަލު ކުރަން ފަށާނެ ކަމުގައިވެސް ހީނާ ވަނީ ވިދާޅުވެފައެވެ.
ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން، ޚަރަދު ކުޑަކުރުމުގެ ގޮތުން އަޅުއްވާ ސީދާ ފިޔަވަޅެއްގެ ގޮތުން އެކި އެކި ވުޒާރާތަކުން ޖުމުލަ 228 ސިޔާސީ މުވައްޒަފުން ވަކި ކުރުމަށް އެންގެވިކަން ރައީސް އިއުލާނު ކުރެއްވީ މިދިޔަ މަހުގެ 15 ވަނަ ދުވަހުއެވެ.
އެގޮތުން 15 ދުވަސްތެރޭގައި ވަކި ކުރުމަށް ރައީސް އެންގެވި 228 ސިޔާސީ މުވައްޒަފުންގެ ތެރޭގައި ހިމެނެނީ:
- 7 ސްޓޭޓް މިނިސްޓަރުން
- 43 ޑެޕިއުޓީ މިނިސްޓަރުން
- 109 ސީނިއާ ޕޮލިޓިކަލް ޑިރެކްޓަރުން
- 69 ޕޮލިޓިކަލް ޑިރެކްޓަރުން
މި ބަދަލާއެކު ސަރުކާރުގެ ބަޖެޓުން މަހަކު 5.714 މިލިއަން ރުފިޔާ ސަލާމަތްވެގެން ދާނެކަމަށްވެސް ރައީސް ވިދާޅުވިއެވެ.
