ރާއްޖޭގައި އަމިއްލަ ޑިޖިޓަލް ފައިސާއެއް ތަޢާރަފްކުރުމުގެ މަސައްކަތް ސަރުކާރުން ފަށައިފިއެވެ.
ރައީސް ޑރ. މުޙައްމަދު މުޢިއްޒު ވިދާޅުވި ގޮތުގައި، 2030 ވަނަ އަހަރާ ހަމައަށް ރާއްޖޭގެ އިޤްތިޞާދުގެ 15 އިންސައްތަ ޑިޖިޓަލް އިޤްތިޞާދަށް ބަދަލުކުރުމަށް ވަނީ ރޭވިފައެވެ. މި ވާހަކަ އެމަނިކުފާނު ދެއްކެވީ އެމްއެންޔޫގެ ދަސްވެނިވުމުގެ ޖަލްސާގައެވެ.
މި މަޤްޞަދު ޙާޞިލްކުރުމަށްޓަކައި ޑިޖިޓަލް ކަރަންސީއާބެހޭ ޤާނޫނުތައް އެކުލަވާލައި، ކްރިޕްޓޯ ކަރަންސީ ތަޢާރަފްކުރުމަށް އެމްއެމްއޭގެ ގަވަރުނަރަށް ވަނީ އަންގަވާފައެވެ. މި މަސައްކަތުގެ އަމަލީ މަރުހަލާ މިހާރު ވަނީ ފެށިފައެވެ.
ރައީސް އިތުރަށް ވިދާޅުވި ގޮތުގައި، ޑިޖިޓަލް ކަރަންސީ ތަޢާރަފްކުރުމުގައި ބައިނަލްއަޤްވާމީ މިންގަނޑުތަކަށް ފެތޭގޮތަށް މަސައްކަތްކުރެވޭނެއެވެ. އަދި މިއީ ޒުވާނުންނަށާއި ވިޔަފާރިވެރިންނަށް އިތުރު ފުރުޞަތުތަކެއް ހުޅުވިގެންދާނެ ކަމެއް ކަމަށް ވެސް ވިދާޅުވިއެވެ. މީގެ އިތުރުން، އާޓިފިޝަލް އިންޓެލިޖެންސްގެ ދާއިރާއިން ރާއްޖެ ވާނީ ދުނިޔޭގެ އެންމެ ކުރީ ސަފުގައި ކަމަށް ވެސް ވިދާޅުވިއެވެ.
އެމްއެމްއޭގެ ގަވަރުނަރު އަޙްމަދު މުނައްވަރު ވިދާޅުވި ގޮތުގައި، ރާއްޖޭގެ ޑިޖިޓަލް ފައިސާ ވާނީ ރައްކާތެރި އަދި އިތުބާރުހުރި ފައިސާއަކަށެވެ. މިކަމުގެ ޚާއްޞަ މަސައްކަތްތަކެއް މިހާރުވެސް އެމްއެމްއޭއިން ދަނީ ކުރަމުންނެވެ. އެމްއެމްއޭއިން ޑިޖިޓަލް ފައިސާއެއް ތަޢާރަފްކުރުމުގެ މައިގަނޑު މަޤްޞަދަކީ އެއީ ސްޓޭބަލް އަދި ރައްކާތެރި ފައިސާއަކަށް ހެދުން ކަމުގައި ގަވަރުނަރު ވަނީ ވިދާޅުވެފައެވެ.
