ކުޅުދުއްފުށީ ސިޓީ ގެއެއްގައި އަލިފާން ރޯވެ މުޅި ގެ ބޭނުން ނުކުރެވޭ ވަރަށް އަނދައި ހުލިވެއްޖެއެވެ.
ރޭ 21:00 ހާއިރު އެގޭގައި ރޯވި އަލިފާންގަނޑު ނިވުމަށް އެރަށުގެ ގިނަ އަދަދެއްގެ މީހުންނާއި ކުޅުދުއްފުށި އެމްއެންޑީއެފް ފަޔަރ އެންޑް ރެސްކިއު ޓީމުންވެސް ހަރަކާތްތެރި ވެފައިވެއެވެ.
އެގޮތުން އެ ގޭގެ ވެރިފަރާތުން ބުނެފައި ވާގޮތުގައި މިހާދިސާގައި އެ ގެ ބޭނުން ނުކުރެވޭ ވަރަށް އަނދައި ވަނީ ހުލިވެފައެވެ.
މީގެ އިތުރުން ވެރިފަރާތުން މައުލޫމާތު ދިން ގޮތުގައި އެ ގޭގައި އަލިފާން ރޯވި ސީދާ ސަބަބެއް އެނގިފައިނުވާ އިރު، މިއީ ކަރަންޓް ސޯރޓްވެގެން ހިނގި ހާދިސާއެއްކަމަށް ލަފާކުރެވެއެވެ.
މީގެ ދެތިން އަހަރު ކުރިން މަރާމާތުކޮށްގެން މީހުން އުޅެމުން އައި އެ ގެ މަރާމާތު ކުރުމަށް ބޭނުންކޮށްފައި ވަނީ ގިނައިން ފިލާ ކަމުގައި ވުމުން، އަލިފާންގަނޑު އެހާ ބޮޑަށް ފެތުރި ރޯވި ކަމުގައިވެސް ވެރިފަރާތުން ބުނެފައިވެއެވެ.
މި ހާދިސާއާއި ގުޅިގެން އެމްއެންޑީއެފުން ބުނެފައިވަނީ، އެ ސިޓީގެ، ސަމޭދާން” ނަމަކަށް ކިޔާ ގޭގައި އަލިފާން ރޯވެގެން އުޅޭކަމުގެ މައުލޫމާތު، ރޭގެ 21:13 ހާއިރު އެމްއެންޑީއެފް ނޮދަން އޭރިއާ ކޮމާންޑް، ކުޅުދުއްފުށި ފަޔަރ ސްޓޭޝަނަށް ލިބިފައިވާ ކަމަށެވެ.
އެގޮތުން އެ ފަޔަރ ސްޓޭޝަނުގެ ފަޔަރ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކުރިއަށް ގެންގޮސްފައި ކަމަށާއި އެ އަލިފާންގަނޑު ނިއްވާލެވިފައިވަނީ، ރޭގެ 22:25 ހާއިރު ކަމަށެވެ.
މިހާދިސާގައި އެއްވެސް މީހަކަށް އަނިޔާވެފައި ނުވާކަމަށް އެމްއެންޑީއެފުން ބުނެފައިވެއެވެ.
