ރޭ ހުޅުމާލޭގައި ބާރު ސްޕީޑްގައި ސައިކަލު ދުއްވާފައި ދަނިކޮށް މަޑުކުރަން ބުނުމުން ފުލުހެއްގެ ގައިގައި ސައިކަލުން ޖެއްސި ޒުވާނަކު ހައްޔަރުކޮށްފިއެވެ.
ފުލުހުން ހާމަކޮށްފައިވާ ގޮތުގައި، ރޭ 22:42 ހާއިރު ހުޅުމާލެ ރީތިގަސް މަގުން ބާރު ސްޕީޑުގައި ސައިކަލު ދުއްވާފައި ދިޔަ މީހެއްގެ ގާތުގައި މަޑުކުރުމަށް އެދުމުން މަޑުނުކޮށް ދިއުމަށް މަސައްކަތް ކޮށްފައިވާކަމަށެވެ.
އެގޮތުން އޭނާ މަޑު ނުކުރުމުން، މަޑުކުރުވަން މަސައްކަތް ކުރި ފުލުސް މިހާގެ ގައިގައި ސައިކަލުން ޖައްސައި ފުލުހުންގެ ދައުރު އަދާކުރުމަށް ހުރަސް އަޅައިފައިވާ ކަމަށް ފުލުހުން ބުނެއެވެ.
މި މައްސަލަައިގައި ފުލުހުން ހައްޔަރުކޮށްފައިވަނީ, ހދ ކުޅުދުއްފުށި މިލްކުރާގެ / އުމުރުން 18 އަހަރުގެ އަހްމަދު ޝާހީން ޝަހީދެވެ.
ފުލުހުން އިތުރަށް ބުނީ، ހައްޔަރު ކުރި މިހާގެ އަތުގައި ސައިކަލު ދުއްވުމުގެ ލައިސަންސް ނެތް ކަމަށެވެ.
މިހާދިސާގައި ސައިކަލުން ޖެހުނު ފުލުސް މީހާއަށް އަނިޔާވެ ހޮސްޕިޓަލްގައި ފަރުވާދިނުމަށްފަހު ދޫކޮށްލައިފައި ވާކަމަށް ފުލުހުން ބުނި އިރު، މި މައްސަލަ ފުލުހުން ގެންދަނީ އިތުރަށް ތަޙުޤީގު ކުރަމުންނެވެ.
