ނޮވެންބަރު 3 ގެ ރަމްޒުކޮށްދޭ ތަކެތި ހިމެނޭހެން ތައްޔާރުކޮށްފައިވާ ނަޞްރުގެ ދުވަހު މައުރަޒު، ރައީސުލްޖުމްހޫރިއްޔާ ޑރ މުހައްމަދު މުއިއްޒު ހުޅުއްވައި ދެއްވައިފިއެވެ.
ނޭޝަނަލް އާޓް ގެލަރީގައި ތައްޔާރުކޮށްފައިވާ މި މައުރަޒު ހުޅުވުމަށް މިއަދު ހެނދުނު ބޭއްވި ރަސްމިއްޔާތުގައި، ރައީސްގެ އިތުރުން ނައިބުރައީސާއި ރައްޔިތުންގެ މަޖިލީހުގެ ރައީސް އަދި ދައުލަތުގެ ވެރިންނާއި ސިފައިންގެ މަތީ ވެރިން ވަނީ ބައިވެރިވެވަޑައިގެންފައެވެ.
މި މައުރަޒުގައި 1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި ހަމަލާގައި ލިބުނު ގެއްލުންތަކާއި، އެހަމަލާގައި ނަސްރު ހޯދުމަށް ދިވެހި ސިފައިން ދައްކުވާފައިވާ ހިތްވަރު ފެނިގެން ދާނެ ރަމްޒުތައް ބެހެއްޓިފައިވާއިރު، އެދުވަހުގެ ޢުދުވާނީ ހަމަލާ ހިނގި ގޮތާއި އެދުވަހާ ގުޅޭ ހުރިހާ މައުލޫމާތެއް ލިބޭނެ އިންތިޒާމުތައްވެސް ހަމަޖައްސައިފައި ހުއްޓެވެ.
އޭގެ ތެރޭގައި އެދުވަހުގެ ކުރެހުމާއި ފޮޓޯއާއި އަޑާއި، މަންޒަރުގެ އިތުރުން އެ ދުވަހާ ގުޅޭ ތަކެއްޗާއި އެދުވަހު ބޭނުން ކުރި ބައެއް އާލާތްތައް ވެސް ހިމެނެއެވެ.
އަންނަ އާދީއްތަ ދުވަހާއި ހަމައަށް މި މައުރަޒު ކުރިއަށްދާއިރު، ކޮންމެ ދުވަހަކު ހެނދުނު 9 އިން 12 އަށް، އަދި މެންދުރު ފަހު 2:00 އިން 6:00 އަށް އަދި ރޭގަނޑު 8:00 އިން 10:00 އަށް ހުޅުވިފައި ހުންނާނެއެވެ.
މި ފަހުން ފާއިތުވި އަހަރުތަކުގައި ނަޞްރުގެ ދުވަސް އެހާ ކުލަގަދަކޮށް ފާހަގަކޮށްފައެއް ނުވެއެވެ.
އެހެން ނަމަވެސް ނަޞްރުގެ ދުވަހަކީ ދިވެހިން އަހަންމިއްޔަތުކަން ދީގެން ޚާއްސަ ކަމެއް ދީގެން ފާހަގަ ކުރަންޖެހޭ ދުވަހެއް ކަމަށާއި މި ސަރުކާރުގައި ނަޞްރުގެ ދުވަސް ކުލަގަދަ ގޮތެއްގައި ފާހަގަކުރައްވާނެ ކަމަށް ރައީސް ޑރ މުހައްމަދު މުއިއްޒު ވަނީ، މީގެ ކުރިން ވިދާޅުވެފައެވެ.
