ރޭ ފަތިހުގެ ވަގުތެއްގައި މަޖީދީމަގުގައި ހުންނަ ޒިއޯން މޯބައިލްސް 4 ފިހާރައިގެ ބިއްލޫރިގަނޑެއް ތަޅާލައި ވައްކަންކުރި މައްސަލައިގައި މީހަކު ހައްޔަރުކޮށްފިއެވެ.
މި މައްސަލައިގައި ފުލުހުން ހައްޔަރުކޮށްފައިވަނީ، އުމުރުން 47 އަހަރުގެ ދިވެހި ފިރިހެނެއް ކަަމަށް ފުލުހުން ބުނެފައިވެއެވެ.
ފުލުހުން މިއަދު ހާމަކުރި ގޮތުގައި މިކަން ހިނގި ކަމުގެ ރިޕޯޓް ފުލުހުންނަށް ލިބުނީ މިއަދު ފަތިހު 5:35 ހާއިރެވެ.
މި މައްސަލަ ފުލުހުން އަންނަނީ އިތުރަށް ތަހުޤީގު ކުރަމުންނެވެ.
އާންމުވެފައިވާ ސީސީޓީވީ ފުޓޭޖް ތަކުން ފެންނަ ގޮތުގައި އެ ފިހާރަ ކައިރިން ދިޔަ މީހެއް ދަނގަޑު އެއްޗެއް ބޭނުންކޮށްގެން އެ ފިހާރައިގެ ބިއްލޫރިގަނޑު ތަޅާލައިފައި ގޮސް ކައިރީގައި އޮތް ގޯޅިން އަޅާލައެވެ.
އޭގެ ފަހުން އެހެން މީހެއް އައިސް އެ ފިހާރައަށް ވަދެ ފިހާރައިގެ ކައުންޓަރު ހަލާކުކޮށްގެން ފައިސާގެ އިތުރުން ފިހާރައިން ފޯނުތަކެއްވެސް ވަގަށް ގެންދެއެވެ.
މި ފަހަކަށް އައިސް މާލެ ސަރަހައްދުގައި ވައްކަމާއި ފޭރުން ވަރަށް ބޮޑަށް އާންމުވެފައި ވާއިރު، ފުލުހުންގެ އިދާރާއަށް މިދިޔަ މަހު އެންމެ ގިނައިންވެސް ހުށަހެޅިފައިވަނީ އެކްސިޑެންޓާއި ވައްކަމުގެ މައްސަލަތައް ކަމުގައި ފުލުހުން ބުނެއެެވެ.
