ކުރިން މާލޭގައި ހިންގަމުން އައި ސީއެޗްއެސްއީގައި އަލުން ކިޔަވައިދިނުމަށް ނިންމައި އެ އިމާރާތް މަރާމާތުކުރުމަށްފަހު ކިޔެވުން ފަށައި ރަސްމީކޮށް އެ ސްކޫލް ރޭ ހުޅުވައިފިއެވެ.
ސީއެޗްއެސްއީގެ މާލޭ އިމާރާތް ރަސްމީކޮށް އަލުން ހުޅުވައިދެއްވީ، ރޭ އެ ސްކޫލުގައި ބޭއްވި ރަސްމިޔާތެއްގައި ރައީސުލްޖުމްހޫރިއްޔާ، ޑރ. މުހައްމަދު މުއިއްޒެވެ.
މާލޭގައި ހިންގަމުން އައި ސީއެޗްއެސްއީގެ އިމާރާތް ގިނަ ދުވަސް ވެގެންނާއި ޖާގައިގެ ދަތިކަން އިތުރުވެގެން ބަންދުކުރީ މިދިޔަ ސަރުކާރުން ހުޅުމާލޭގައި އިމާރާތްކުރި ސީއެޗްއެސްއީގެ އައު އިމާރާތުގައި ކިޔަވައިދޭން ފެށުމަށެވެ.
އެހެން ނަމަވެސް މާލެއިން ގިނަ އަދަދެއްގެ ދަރިވަރުން ކޮންމެ ދުވަހަކު ކިޔެވުމަށް ހުޅުމާލެއަށް ދިއުމުގެ ތަކުލީފުތައް ގިނަ އަދަދެއްގެ ބެލެނިވެރިން ކުރުމާއި މާލޭގައިވެސް އޭލެވެލްއަށް ކިޔަވައިދޭ ސަރުކާރުގެ ސްކޫލެއް ހުރުމަކީ މުހިއްމުކަމެއްކަމަށް ވިދާޅުވެ، މި ސަރުކާރުން ވަނީ ކުރިން ސީއެޗްއެސްއީ މާލޭގައި ހިންގި އިމާރާތް މަރާމާތުކޮށް އަލުން އެތަނުގައި ކިޔަވައިދޭން ފަށައިފައެވެ.
ސީއެޗްއެސްއީގެ މާލޭ ސްކޫލް ރަސްމީކޮށް ހުޅުވުމަށް ރޭ ބޭއްވި ރަސްމިޔާތުގައި އެސްކޫލްގެ ދަރިވަރުންގެ ފަރާތުން ވަނީ ސްކޫލުގެ އެހާރާއި މިހާރުގެ ހަނދާނީ ރަމްޒެއް ވެސް ރައީސްއަށް އަރުވާފައެވެ.
މާލޭގައި ޒަމާންވަންދެން އޭލެވެލް ކިޔަވަމުން އަންނަ ސީއެޗްއެސްއީއަކީ 1969 ވަނަ އަހަރު ސައިންސް އެޑިއުކޭޝަން ސެންޓަރުގެ ނަމުގައި ހުޅުވި ސްކޫލެކެވެ. އެ ސްކޫލުގެ ނަން ސީއެޗްއެސްއީއަށް ބަދަލުކޮށްފައިވަނީ 2000 ވަނަ އަހަރުއެވެ.
