މަސްވެރިންގެ ދުވަހާއި ގުޅިގެން މަސްވެރިކަމުގެ ދާއިރާއިން ކެޔޮޅުންނާއި ފަރުމަސްވެރިންނަށް ދިނުމަށް ހަމަޖެހިފައިވާ އެވޯޑަށް ކުރިމަތި ލުމަށް ހުޅުވާލި ފުރުސަތު ފިޝަރީޒް މިނިސްޓްރީން އިތުރުކޮށްފިއެވެ.
އަމިއްލަ ވަކި ވަކި ފަރުދުނަށްވެސް ކުރިމަތި ލެވޭގޮތަށް މިއަހަރުގެ މަސްވެރިންގެ ދުވަހު ދިނުމަށް ހަމަޖެހިފައިވާ ޒުވާން ކެޔޮޅާއި ތަޖުރިބާކާރު ކެޔޮޅާއި އަދި ފަރުމަސްވެރިޔާގެ އެވޯޑްއަށް ކުރިމަތިލުމުގެ ފުރުސަތު ފިޝަރީޒް މިނިސްޓްރީން ހުޅުވާލީ މިދިޔަ މަހުގެ ނުވަ ވަނަ ދުވަހުއެވެ.
އެހެން ނަމަވެސް މިއަދު އެ މިނިސްޓްރީން ވަނީ، އެ އެވޯޑްތަކަށް އެދި ކުރިމަތިލުމުގެ ފުރުސަތު މި މަހުގެ 21 ވަނަ ދުވަހާ ހަމައަށް އިތުރުކޮށް އިއުލާނުކޮށްފައެވެ.
ކޮންމެ އަހަރެއްގެ ޑިސެމްބަރު މަހުގެ 10 ވަނަ ދުވަހު ފާހަގަކުރާ މަސްވެރިންގެ ދުވަސް ސަރުކާރުގެ ފަރާތުން މި އަހަރު ފާހަގަކުރުމަށް ހަމަޖެހިފައިވަނީ، ޑިސެމްބަރު މަހުގެ 10 ވަނަ ދުވަހުގައެވެ.
އެކި އެކި ސަރުކާރުތަކުގައި މަސްވެރިންނާއި މެދު އިހުމާލުވެ މަސްވެރިންގެ ގިނަ ކަނބޮޑުވުންތަކެއް ހުރި އިރު އެކަންކަން ޙައްލުކޮށްދިނުމަށް ގިނަ ވަޢުދުތަކަކާއެކު މިހާރުގެ ސަރުކާރުން މަސައްކަތްތަކެއް އަންނަނީ ކުރަމުންނެވެ.
އެގޮތުން މި ސަރުކާރުން ވެރިކަމާއި ޙަވާލުވީއިރު، މިދިޔަ ސަރުކާރުގައި މަސްވެރިން ކިރި މަހަށް ވާ ގިނަ އަދަދެއްގެ ފައިސާ ނުދެވި ހުއްޓެވެ.
އެގޮތުން ސަރުކާރުން ހާމަކުރި ގޮތުގައި މަސްވެރިންނަށް ނުދެވި ހުރި ގިނަ އަދަދެއްގެ ފައިސާ މަސްވެރިންނަށް ދީ ޚާލާސްކުރުމަށްޓަކައި މިހާތަނަށް މި ސަރުކާރުން މަސްވެރިންނަށް 1.04 ބިލިއަން ރުފިޔާ ވަނީ ދޫކުރެވިފައެވެ.
