2026 ވަނަ އަހަރާއި ހަމައަށް މުޅި ރާއްޖޭގެ ކޮންމެ ރަށެއްގައި އޭޓީއެމް ޤާއިމްކޮށް ޚިދުމަތް ދިނުމަށް ނިންމައި އެކަމުގެ އެއްބަސްވުމުގައި ސޮއިކޮށްފިއެވެ.
މިއަދު ބޭއްވި ޚާއްސަ ރަސްމިޔާތެއްގައި ރާއްޖޭގައި މީހުން ދިރިއުޅޭ ހުރިހާ ރަށެއްގައި އޭޓީއެމް ޤާއިމްކުރުމުގެ މަސްރޫޢު ރައީސް ޑރ މުޙައްމަދު މުޢިއްޒު އިފްތިތާޙް ކޮށްދެއްވައި އެކަމުގެ އެއްބަސްވުމުގައި ބީއެމްއެލާއި އިކޮނޮމިކް މިނިސްޓްރީއާއި ދެމެދު ވަނީ ސޮއިކޮށްފައެވެ.
މި އެއްބަސްވުމުގައި ބީއެމްއެލްގެ ފަރާތުން ސޮއިކުރެއްވީ، ބީއެމްއެލްގެ މެނޭޖިން ޑިރެކްޓަރު މުޙައްމަދު ޝަރީފެވެ. އަދި އިކޮނޮމިކް މިނިސްޓްރީގެ ފަރާތުން މި އެއްބަސްވުމުގައި ސޮއިކުރެއްވީ، އިކޮނޮމިކް މިނިސްޓަރު މުޙައްމަދު ސައީދެވެ.
ރާއްޖޭގައި މީހުން ދިރިއުޅޭ ހުރިހާ ރަށެއްގައި ބީއެމްއެލްގެ އޭޓީއެމް ޚިދުމަތް ދިނުމަށް ރައީސް ޑރ މުޙައްމަދު މުޢިއްޒު ވެ ވަޑައިގެނެވި ވަޢުދުފުޅުގެ ތެތެރެއިން މިއަދު އިފްތިތާޙްކުރެވުނު މަޝްރޫޢާއެކު މިއަދު ވަނީ، ބީއެމްއެލްއިން ގާއިމުކުރި 150 ވަނަ އޭޓީއެމް އދ. އޮމަދޫގައި ހުޅުވައިފައެވެ.
އެގޮތުން މި ރަސްމިޔާތުގައި ވާހަކަފުޅު ދައްކަވަމުން ބީއެމްއެލްގެ ސީއީއޯ ޝަރީފް ވިދާޅުވީ، މިއަދު އިފްތިތާޙް ކުރެވިގެން މިދިޔަ މަޝްރޫޢަކީ، ރައްޔިތުންނަށް މާލީ އެހީތެރިކަން ފޯރުކޮށްދިނުމަށް ބީއެމްއެލުން ކުރަމުން އަންނަ މަސައްކަތުގެ ހެއްކެއް ކަމަށާއި އަންނަ އަހަރުގެ ތެރޭގައި 100 އަށް ވުރެ ގިނަ ރަށުގައި އޭޓީއެމްތައް ހުޅުވުން އެއީ ބީއެމްއެލްގެ އަމާޒެއްކަމަށެވެ.
ރާއްޖޭގައި ބީއެމްއެލްގެ އޭޓީއެމް ޚިދުމަތް ފެށިތަނަށް މި ފެށޭ އަހަރު 25 އަހަރު ފުރޭނެއެވެ.
