މާލޭގެ މަޝްހޫރު ސެލޫނެއްކަމަށްވާ ސަރާ ސެލޫންގައި ހަށިވިއްކަމުން ދިޔަ ބަޔަކު ހައްޔަރުކޮށްފިއެވެ.
ހެންވޭރުގެ ގެޔެއްގައި ހިންގަމުން އަންނަ މި ސެލޫން ފުލުހުން ބަލައި ފާސްކޮށްފައިވަނީ، ފުލުހުންގެ އިންޓެލިޖެންސްއަށް ލިބުނު މައުލޫމާތަކާއި ގުޅިގެން މި މަހުގެ 5 ވަނަ ދުވަހުކަމަށް ފުލުހުން ބުނެއެވެ.
އެގޮތުން ފުލުހުން ބުނެފައިވަނީ މި އެޮޕަރޭޝަންގައި ޖުމުލަ 5 މީހަކު ހައްޔަރުކޮށްފައިވާކަމަށާއި އެ ފަސްމީހުންގެ ތެރޭގައި ހިމެނީ ދިވެހި ފިރިހެނަކާއި ބިދޭސީ 4 އަންހެނުން ކަމަށެވެ. އެގޮތުން ހައްޔަރުކުރި 4 ބިދޭސީންނަކީވެސް ތައިލޭންޑަށް ނިސްބަތްވާ އަންހެނުންތަކެއް ކަމަށް ފުލުހުން ބުނެފައިވެއެވެ.
މި މައްސަލައާއި ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ:
ގއ. ކަނޑުހުޅުދޫ / ޕާކީޒާ، މުޙައްމަދު ޢިމްރާން
ސަލިނީ ޔަމްޑީ (30އ)
ޗަޔަނިޓް ޕިލާ (30އ)
ވިލައިޕޯން ކޮޓްވޮންގް (24އ)
ތިޕްސުދާ ސަންގްހަމް (33އ)
ފުލުހުން ބުނީ މި މީހުންގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ތިޕްސުދާ ސަންގްހަމް 15 ދުވަހަށް އަދި ދެންތިބި ހަތަރު މީހުން ހަތް ދުވަހަށް ބަންދުކުރުމަށް ކޯޓުން އަމުރުކޮށްފައި ވާކަމަށެވެ.
މި މައްސަލަ ފުލުހުން ދަނީ އިތުރައް ތަހުގީގު ކުރަމުންނެވެ.
މާލެ ސަރަޙައްދުގައި ގިނަ ސްޕާތަކެއް ހިންގަމުން އަންނަ އިރު ގިނަ އާންމުން ތުހުމަތު ކުރާ ގޮތުގައި މިފަދަ ގިނަ ތަންތަން ހިންގަމުން އަންނަނީ ހަށިވިއްކުމާއި އެފަދަ އެހެނިހެން ޖިންސީ އަމަލުތައް ހިންގުމަށެވެ.
އެގޮތުން ދޭތެރެ ދޭތެރެއިން މި ފަދަ ތަންތަން ބަލައި ފާސްކޮށް އޭގެ އިތުުރުންވެސް ގެސްޓް ހައުސް ފަދަ ތަންތަނުންވެސް ހަށި ވިއްކަމުން އަންނަ މީހުން ހައްޔަރު ކުރާކަން ފާހަގަކޮށްލެވެއެވެ.
ރާއްޖޭގައި އާންމުގޮތެއްގައި މި ވިޔަފާރީގައި ހަރަކާތްތެރިވަނީ ބިދޭސީ އަންހެނުންނެވެ.
