ހިޔާ ފްލެޓްގެ އެޕާޓްމަންޓެއްގައި ހިންގަމުން އައި ޑްރަގް ކެފޭއެއްގައި މީހަކު ރަހީނުކޮށްގެން ގެންގުޅުނު ގޭންގެއްގެ 12 މީހުން ހައްޔަރުކޮށް، ރަހީނުކުރި މީހާ ސަލާމަތްކޮށްފިއެވެ.
ރޭ 8 ޖަހާ ހާއިރު ފުލުހުން ވަނީ ހިޔާ ފްލެޓް ޓަވަރު 9 ކައިރިން މީހަކު ރަހީނުކޮށްގެން ހިޔާ ޓަވަރުގެ އެޕާޓްމަންޓަކަށް ގެންދިޔަ ކަމުގެ މައުލޫމާތު ލިބިފައިވާ ކަމަށާއި، އެ މައުލޫމާތު ލިބުމާއެކު ފުލުހުންގެ އިންޓެލިޖެންސުން ކުރި މަސައްކަތުން ކުޑަ ވަގުތުކޮޅެއްގެ ތެރޭގައި އެ އެޕާޓްމަންޓް ދެނެގަނެވިފައިވާކަމަށް ފުލުހުން ބުނެފައިވެއެވެ.
އެގޮތުން އެ އެޕާޓްމަންޓަށް ފުލުހުން ވަތް އިރު ރަހީނުކުރި މިހާގެ ބޯ ބަލައިފައި ވާކަމަށާއި އޭނާގެ އިނގިލިތައް ބުރިކޮށް ނުލެވި ވަނީ ކިރިޔާ ކަމުގައި އެ މީހާއާއި ހަވާލާދީ ފުލުހުން ބުނެފައިވެެއެވެ.
ފުލުހުން ވަނީ އެ އެޕާޓްމަންޓުން ގިނަ އަދަދެއްގެ ޒުވާނުން ވެސް ހިމެނޭގޮތަށް ޖުމުލަ 12 މީހަކު ހައްޔަރުކޮށްފައެވެ.
އެގޮތުން ފާހަގަކޮށްލެވޭ ގޮތުގައި އެ އެޕާޓްމަންޓަކީ ގިނައަދަދަކަށް މަސްތުވާތަކެތި ބޭނުން ކުރާ އަދި އެ ތަކެތީގެ ވިޔަފާރިކުރަމުން އަންނަ އެޕާޓްމަންޓެއްކަން ތަނުގެ އެތެރެއަށް ބަލައިލުމުން އެނގެއެވެ.
މި މައްސަލައާއި ގުޅިގެން ހޯމް މިނިސްޓަރު އިހުސާން ވަނީ، ގޭންގުތައް ހިންގަމުން އަންނަ މީހުންނަށް ޤާނޫނުގެ ތެރެއިން އަދަބު ދޭނެކަމަށް ވިދާޅުވެފައެވެ.
ހިޔާ ފްލެޓުގައި މީހުން ރަހީނުކުރާ މައްސަލަތައް ވަރަށް ބޮޑަށް ވަނީ އިތުރުވެފައެވެ. އެގޮތުން މީހުންނަށް އޮޅުވާލައިގެން ހިޔާ ފްލެޓަށް ގެންގޮސް ފައިސާ އާއި އަގު ބޮޑު މުދާ ފަދަ ތަކެތި ފޭރޭ މައްސަލަތައް މީގެކުރިން ވެސް ފެންމަތިވެފައިވެއެވެ.
