ގޫގުލްއިން އެ ކުންފުނީގެ ވޯކްސްޕޭސް އެޕްލިކޭޝަންތަކަށް އިތުރު އައު ވަސީލަތެއް ތަޢާރަފުކޮށްފިއެވެ. “ވިޑްސް” ގެ ނަމުގައި ތަޢާރަފުކޮށްފައިވާ މި އައު އެޕްލިކޭޝަނަކީ އާޓިފިޝަލް އިންޓެލިޖެންސް ބޭނުންކޮށްގެން ފަސޭހައިން ވީޑިއޯ ތައްޔާރުކުރެވޭނެ ޓޫލްއެކެވެ.
ގޫގުލްގެ ބްލޮގެއްގައި ހާމަކޮށްފައިވާ ގޮތުގައި، މި އައު އެޕްލިކޭޝަނަކީ ގޫގުލް ޑޮކްސް އަދި ސްލައިޑްސް ފަދަ އެހެން ޕްރޮޑަކްޓިވިޓީ ޓޫލްތަކާއެކު ބޭނުންކުރެވޭނެ އެޕްލިކޭޝަނެކެވެ. ވިޑްސްގެ އެންމެ މުހިންމު ސިފައަކީ ވީޑިއޯ އެޑިޓިންގގެ ތަޖުރިބާއެއް ނެތް ފަރާތްތަކަށްވެސް ފަސޭހައިން ވީޑިއޯ ތައްޔާރުކުރެވޭނެ ގޮތް ހަދައިދިނުމެވެ.
https://www.youtube.com/watch?app=desktop&v=eFM9epoRWOoމި އެޕްލިކޭޝަންގައި ސްޓޮކް ފުޓޭޖް އަދި ބެކްގްރައުންޑް އޯޑިޔޯ ފަދަ ވަސީލަތްތައް ހިމެނޭއިރު، ސްޓޯރީބޯޑް ފޯމެޓެއްގައި ވީޑިއޯ އެޑިޓްކުރުމުގެ ފުރުސަތު ލިބިގެންދާނެއެވެ. ގޫގުލްއިން ބުނާގޮތުގައި ވިޑްސް މި އަހަރުގެ ޖޫން މަހު ވޯކްސްޕޭސް ލެބްސްގެ ބޭނުންކުރާ ފަރާތްތަކަށް ލިބޭނެއެވެ.
މީގެ އިތުރުން، ގޫގުލްއިން ވަނީ އެ ކުންފުނީގެ އެހެން ޚިދުމަތްތަކަށްވެސް އޭއައި ޓެކްނޮލޮޖީ އިތުރުކޮށްފައެވެ. މީގެ ތެރޭގައި އޭއައި އަށް ބިނާކޮށްފައިވާ ސެކިއުރިޓީ އެޑް-އޮން އަކާއި، ގޫގުލް ޝީޓްސްއަށް އިތުރުކުރެވުނު އައު ޓޭބަލްސް ފީޗަރ، އަދި ގޫގުލް މީޓަށް އިތުރުކުރެވުނު ތަރުޖަމާ ކުރުމުގެ ވަސީލަތް ހިމެނެއެވެ.
ފާއިތުވި ދުވަސްތަކުގައި ގޫގުލްއިން ވަނީ އެ ކުންފުނީގެ ޝޮޕިންގ ޓޫލްގައިވެސް އޭއައި ޓެކްނޮލޮޖީ ތަޢާރަފުކޮށް، ފޮޓޯ ބޭނުންކޮށްގެން ހެދުން ހޯދުމާއި ސްޓައިލް ހޯދުމުގެ ޚިދުމަތް ތަޢާރަފުކޮށްފައެވެ. މި ހުރިހާ ކަމަކީވެސް ގޫގުލްއިން އެ ކުންފުނީގެ ޚިދުމަތްތަކުގައި އޭއައި ޓެކްނޮލޮޖީ އިތުރުކުރުމަށް ކުރަމުންދާ މަސައްކަތުގެ ބައެކެވެ.
