މަގުމަތީގައި ހުރި ސައިކަލެއްގައި ބަހައްޓާފައި ހުރި ސްކޫލު ކުއްޖެއްގެ ފޮތް ދަބަސް ވަގަށް ނެގި މީހަކު ހައްޔަރުކޮށް އޭނާގެ ބަންދަށް 15 ދުވަސް ޖަހައިފިއެވެ.
މި މައްސަލަ ފެންމަތިވީ މީސްމީޑިޔާގައި އަބްދުލް ހަމީދް ނަމަކަށް ކިޔާ މީހަކު، ގްރޭޑް 9 ގައި ކިޔަވާ އޭނާގެ ދަރިފުޅުގެ ދަބަސް ސައިލަކުގައި ބަހައްޓައިފައިވަނިކޮށް މީހަކު ވަގަށް ގެންދިޔަކަން އޭނާގެ ފޮޓޯއާއެކު އާންމުކޮށް ދައުރުވާން ފެށުމުންނެވެ. މި ޕޯސްޓްގައި އޭނާ ވަނީ އެ ދަބަހުގައި އޭނާގެ ދަރިފުޅުގެ ޓެސްޓް ޕޭޕަރުތަކާއި ހުރިހާ ފޮތްތަކެއްވެސް ހުރިކަން ހިއްސާކޮށްފައެވެ.
މި މައްސަލައާއި ގުޅިގެން އިއްޔެ ފުލުހުން ބުނެފައިވަނީ، ނޮވެމްބަރު 5 ވަނަ ދުވަހުގެ ހެނދުނު 08:48 ހާއިރު އަމިރުއަހުމަދު މަގު / ކަސްތޫރިގޯޅި ހިމެނޭ ސަރަހައްދުގައު ޕާކުކޮށްފައި ހުރި ސައިކަލެއްގައި ހުރި ދަބަހެއް ވަގަށް ނެގިކަމަށް ތުހުމަތު ކުރެވޭ މައްސަލައެއްގައި މީހަކު ހައްޔަރުކޮށްފައި ވާކަމަށެވެ.
މި މައްސަލައިގައި ފުލުހުން ހައްޔަރުކޮށްފައިވަނީ، ނ. ވެލިދޫ، ހިފާޒް، އުމުރުން 33 އަހަރުގެ އަހުމަދު މާޖިދެވެ.
ފުލުހުން ވަނީ އޭނާ ވަގަށް ނެގި ކަމަށް ތުހުމަތު ކުރެވޭ ދަބަށް އޭގެ ތެރޭގައި ހުރި ތަކެއްޗާއެކު ހޯދައި، ވެރިފަރާތާއި ހަވާލުކޮށްފައެވެ.
މި މައްސަލައާއި ގުޅިގެން އޭނާގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އެ ކޯޓުން ވަނީ މާޖިދު 15 ދުވަހަށް ބަންދުކުރުމަށް ޙުކުމް ކޮށްފައެވެ.
