މުޅި ދިވެހިރާއްޖެ ތަރައްޤީކޮށް މާލެއެކޭ އެއްގޮތަށް ރާއްޖޭގެ ހުރިހާ ހިސާބަކަށް ޚިދުމަތްތައް ފޯރުކޮށްދިނުމަށް ރާއްޖޭގެ އެކި ސަރަހައްދުތަކުގައި ޤާއިމްކުރާ އާރބަން ސެންޓަރުތައް ޤާއިމްކުރާ ރަށްތައް އިއުލާނުކޮށްފިއެވެ.
އެގޮތުން ސަރުކާރުން ޤާއިމްކުރާ އާރބަން ސެންޓަރުތައް ޤާއިމްކުރުމަށް ރައީސް ޑރ މުހައްމަދު މުއިއްޒު ވަނީ ކަނޑައަޅުއްވާފައެވެ.
އެގޮތުން އަރބަން ސެންޓަރުތައް ޤާއިމްކުރާ ރަށްތަކުގެ ނަންނަތައް އިއުލާނުކޮށް ހައުސިން މިނިސްޓްރީން މިއަދު ވަނީ ބަޔާނެއް ނެރެފައެވެ.
އެ ރަށްތަކަކީ:
ރ. އުނގޫފާރު
ބ. އޭދަފުށި
ޅ. ނައިފަރު
އދ. މަހިބަދޫ
ފ. ނިލަންދޫ
ދ. ކުޑަހުވަދޫ
ލ. ފޮނަދޫ
މެދު ރާއްޖެ ތެރޭގެ އެކި ސަރަހައްދުތަކުގައި 7 އަރބަން ސެންޓަރުތަކުގެ އިތުރުން ދެކުނު ހަތަރު އަތޮޅު ހިމެނޭހެން ސަދަން ޑިވެލޮޕްމަންޓް ޒޯނެއް ޤާއިމް ކުރުމަކީ ރައީސް ޑރ މުހައްމަދު މުއިއްޒުގެ ރިޔާސީ ވައުދުފުޅެކެވެ.
އެގޮތުން މި އާބަން ސެންޓަރުތަކުގައި އެންމެ މަތީ ފެންވަރުގައި އެ ރަށެއްގައި ތިބެގެން ކަންކަން ހާސިލްކުރެވޭ މިންވަރަށް ކަންކަން ޤާއިމް ކުރައްވާނެކަމަށް ރައީސް ވަނީ ވިދާޅުވެފައެވެ.
ސަރުކާރުން ބުނާ ގޮތުގައި މިފަދަ އަރބަން ސެންޓަރުތަކަކީ،ރަށަކަށް ބޭނުންވާ ކަންކަން ކޮށްދެމުންދާއިރު ދުރު ރާސްތާއާއި މެދު ރާސްތާއަށް ވިސްނާއިރު ރާއްޖޭގެ ހުރިހާ ރައްޔިތުންނަށް އެންމެ މަތީ ފަންތީގެ ހުރިހާ ހިދުމަތެއް ދެމެހެއްޓެނެވި ގޮތުގައި ދިނުމެވެ.
އަރބަން ސެންޓަރުތައް ޤާއިމްކުރުމުގެ ބިލު ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅައި މީހާރު އެ ބިލު އޮތީ ކޮމެޓީ މަރުހަލާގައެވެ.
