މައިކްރޯސޮފްޓުން އެ ކުންފުނީގެ އެންމެ އާންމު ޓެކްސްޓް އެޑިޓަރ ކަމުގައިވާ ނޯޓްޕެޑަށް އާ އޭ.އައި ފީޗަރތަކެއް ތަޢާރަފުކުރަން ނިންމައިފިއެވެ.
“ރީރައިޓް” ގެ ނަމުގައި ތަޢާރަފުކުރާ މި އާ ފީޗަރއިން ލިޔެފައިވާ ލިޔުމެއް އެކި ގޮތްގޮތަށް ބަދަލުކުރެވޭނެއެވެ. މީގެ ތެރޭގައި ލިޔުން ކުރުކުރުމާއި، ދިގުކުރުމާއި، އަދި ތަފާތު ސްޓައިލްތަކަށް ބަދަލުކުރުން ހިމެނެއެވެ. ކޮންމެ ފަހަރަކު ތިން އޮޕްޝަން ދައްކައި، ބޭނުން ނުވާނަމަ އަލުން ޖެނެރޭޓް ކުރެވޭނެއެވެ..
މި ފީޗަރ ބޭނުންކުރުމަށް، ބަދަލުކުރަން ބޭނުންވާ ޓެކްސްޓް ހައިލައިޓްކޮށް، މައުސް ގެ ކަނާތް ފިތަށް ފިތާލުމުން ނުވަތަ ކީބޯޑުން ކޮންޓްރޯލް + އައި ފިތުމުން މި ފީޗަރ ބޭނުންކުރެވޭނެއެވެ.
މި ފީޗަރ ލިބެން ހުންނާނީ ވިންޑޯސް އިންސައިޑަރ [ވިންޑޯސްގެ ޓެސްޓް ވަރޝަން ބޭނުންކުރާ ފަރާތްތައް] ގެ ކެނަރީ އަދި ޑެވް ޗެނަލްތަކުގައި، ނޯޓްޕެޑް ވަރޝަން 11.2410.15.0 އަޕްޑޭޓާ އެކުގައެވެ. މި ފީޗަރ ބޭނުންކުރުމަށް މައިކްރޯސޮފްޓް އެކައުންޓެއް ބޭނުންވާނެއެވެ.
މި ވަގުތު މި ފީޗަރ ލިބެން ހުންނާނީ އެމެރިކާ، ފްރާންސް، އިނގިރޭސިވިލާތް، ކެނެޑާ، އިޓަލީ އަދި ޖަރުމަނުގައެވެ. އަދި އޮސްޓްރޭލިއާ، ނިއުޒިލޭންޑް، މެލޭޝިއާ، ސިންގަޕޫރު، ތައިވާން އަދި ތައިލެންޑްގެ މައިކްރޯސޮފްޓް 365 ޕާސަނަލް އަދި ފެމިލީ އަދި ކޯޕައިލެޓް ޕްރޯ [މައިކްރޯސޮފްޓްގެ އޭ.އައި ސަބްސްކްރިޕްޝަން] ސަބްސްކްރައިބަރުންނަށް އޭ.އައި ކްރެޑިޓް މެދުވެރިކޮށް ބޭނުންކުރެވޭނެއެވެ.
މި ފީޗަރ މިހާރު ވަނީ ޕްރިވިއު ވަރޝަނެއްގެ ގޮތުގައި ނެރެފައެވެ. އާންމުކޮށް ހުރިހާ ފަރާތްތަކަށް ލިބޭނެ ތާރީޚެއް އަދި އިޢުލާނުކޮށްފައެއް ނުވެއެވެ.
