އަޒަރުބައިޖާންގެ ވެރިރަށް ބަކޫއާއި ރާއްޖެއާއި ދެމެދު ސީދާ ވައިގެ ދަތުރުތައް ފަށައިފިއެވެ.
އަޒަރުބައިޖާން އެއަރލައިންސް އިން ރާއްޖެއަށް މިއަދު ސިދާ ދަތުރުތައް ފެށުމުގެ ގޮތުން އެ އެއަރލައިންސްގެ ފުރަތަމަ ދަތުރުގައި ފުރަތަމަ ފްލައިޓް ވެލާނާ އިންޓަރނޭޝަނަލް އެއަރޕޯޓުގައި ޖައްސައިފައި ވަނީ، މިއަދު ހެނދުނު 9:45 ގައެވެ.
މި ފްލައިޓަށް މަރުހަބާ ކިޔުމުގެ ގޮތުން ވެލާނާ އިންޓަރނޭޝަނަލް އެއަރޕޯޓުގައި ބޭއްވި ރަސްމިއްޔާތުގައި އެމްއޭސީއެލްގެ ސީއީއޯ އިބްރާހީމް ޝަރީފް މުހައްމަދުގެ އިތުރުން ކުންފުނީގެ އިސްވެރިން ވަނީ ބައިވެރިވެވަޑައިގެންފައެވެ.
މި ރަސްމިއްޔާތުގައި ދެއްކެވި ވާހަކަފުޅުގައި އެމްއޭސީއެލްގެ ޗީފް ކޮމާރޝަލް އޮފިސަރ މުހައްމަދު މިހާދު ވިދާޅުވީ، އަޒަރުބައިޖާން އާއި ރާއްޖެއާއި ދެމެދު ސީދާ ދަތުރުތައް ފެށުމުގެ ސަބަބުން އެ ޤައުމުގެ ފަތުރުވެރިންނަށް ރާއްޖެ ޒިޔާރަތް ކުރުމުގެ މަގު ތަނަވަސް ވެގެން ދާނެ ކަމަށެވެ.
މީގެ އިތުރުން އަޒަރުބައިޖާން އެއަރލައިންސްގެ ޗީފް ކޮމާރޝަލް އޮފިސަރ މަޓޭޑާ ވިދާޅުވީ، ކުރިއަށް އޮތް ވިންޓަރ ސީޒަންއާއި ދިމާކޮށް އެ ޤައުމުން ސީދާ ދަތުރުތައް ރާއްޖެއަށް ފެށުމަކީ އެ ޤައުމުގެ ފަތުރުވެރިންނަށް ލިބުނު ވަރަށް ބޮޑު ފަހި ފުރުސަތެއް ކަމަށެވެ.
ރާއްޖެއާއި ބަކޫ އާއި ދެމެދު އަޒަރުބައިޖާން އެއަރލައިންސްއިން ހަފްތާއަކު ދެ ދަތުރުކުރުމަށް ހަމަޖެހިފައިވާއިރު، މި ދަތުރު ތަކުގައި ބޭނުން ކުރުމަށް ހަމަޖެހިފައިވަނީ، އެއަރބަސް ބީ787 މަރުކާގެ ބޯޓެކެވެ.
