1984 މާލޭގައި ހުޅުވި، ރާއްޖޭގެ އިސްލާމީ އެންމެ ބޮޑު ބިނާ ހުޅުވިތަނަށް މިއަދު 40 އަހަރު ފުރިއްޖެއެވެ.
އެގޮތުން އިސްލާމީ މަރުކަޒު ހުޅުވިތާ 40 އަހަރުވުމާއި ގުޅިގެން މިއަދު އެކްސްގައި ކުރި ޕޯސްޓެއްގައި އިސްލާމީ ކަންތައްތަކާއި ބެހޭ ވަޒީރު ޑރ މުޙައްމަދު ޝަހީމް ވިދާޅުވީ، އިސްލާމީ މަރުކަޒުގެ ކަންކަމަށް ރައީސް ޑރ މުޙައްމަދު މުޢިއްޒު ވަރަށް ޚާއްސަ އިސްކަމެއް ދެއްވާ ކަމަށާއި ކުރިއަށް އޮތް އަހަރު އިސްލާމީ މަރުކަޒުގެ ފުރިހަމަ މަރާމާތެއް ކުރުމަށް ސަރުކާރުން ނިންމާފައިވާކަމަށެވެ.
އެގޮތުން ދީނީ އެކިއެކި ޙަރަކާތްތައް، އޭގެ ތެރޭގައި އިޙްޔާ ފޯރަމްތަކާއި ޤުރްއާން މުބާރާތްތަކާއި ބައިނަލްއަޤުވާމީ އިސްލާމީ ކޮންފަރެންސްތަކާއި ޖަލްސާތައް އިސްލާމީ ަމރުކަޒުގައި މެދުކެނޑުމެއްނެތި ބާއްވަމުން އަންނަތާ 40 އަހަރުވެފައިވާކަން ފާހަގަކުރައްވައި މިނިސްޓަރ ވަނީ، މުޅި ދިވެހި ޤައުމުވެސް އެހާ ލޯބިވާ ބިނާއެއް އިމާރާތް ކޮށްދެއްވި ކަމަށްޓަކައި ކުރީގެ ރައީސް މައުމޫން އަބްދުލް ގައްޔޫމަށް ޝުކުރު ވެސް އަދާކުރައްވާފައިވެއެވެ.
އިސްލާމީ މަރުކަޒަށް 40 އަހަރު ފުރުން ކުލަގަދަކޮށް ފާހަގަކުރުމަށް ސަރުކާރުން ވަނީ ނިންމައިފައެވެ. އެގޮތުން އެ ޚާއްސަ މުނާސަބާ ބޭއްވުމަށް ޚާއްސަ ޖަލްސާއެއް ބޭއްވުމަށް ރައީސް ޑރ. މުހައްމަދު މުއިއްޒު އިރުޝާދު ދެއްވާފައިވާކަމަށްވެސް މިނިސްޓަރ ވިދާޅުވިއެވެ.
ރައީސް މައުމޫންގެ ވެރިކަމުގައި އިސްލާމީ މަރުކަޒު ހުޅުވާފައިވަނީނޮވެމްބަރު 11، 1984 ގައެވެ. އެ މަރުކަޒުގައި 4،500 މީހުންނަށް ނަމާދުކުރެވޭ ޖާގަ ތަނަވަސް މިސްކިތަކާއި ފަސް ކުލާހާއި ލައިބްރަރީއަކާއި ބޮޑު ކޮންފަރެންސް ހޯލެއް ހިމެނެއެވެ.
