ޤަވާއިދާއި ޚިލާފަށް ރާއްޖޭގައި ޙަރަކާތްތެރިވަމުން އަންނަ ބިދޭސީންގެ މައްސަލަ ޙައްލުކުރުމުގެ ގޮތުން ކުރަމުން އަންނަ މަސައްކަތުގެ ތެރެއިން އަނެއްކާވެސް ހުޅުމާލެއިން 5 ބިދޭސީއަކު ހައްޔަރުކޮށްފިއެވެ.
އިމިގްރޭޝަނުން ހާމަކުރި ގޮތުގައި މި މީހުން ހައްޔަރުކޮށްފައިވަނީ، ޤަވާއިދާ ޚިލާފަށް އުޅޭ ބިދޭސީން ހޯދަން ބަލައި ފާސްކުރުމަށް ހިންގަމުންދާ އޮޕަރޭޝަންގެ ތެރެއިން މިދިޔަ ހޮނިހިރު ދުވަހު ހުޅުމާލޭގައި ސެލޫން ހިންގަމުންދިޔަ 6 ތަނެއް ފާސްކުރުމަށް ހިންގި ރެއިޑުގެ ތެރެއިން ކަމަށެވެ.
މި މީހުން އިމިގްރޭޝަންގެ ބެލުމުގެ ދަށަށް ގެންގޮސްފައިވަނީ ސައްހަ ވިސާއެއް ނެތި އުޅެމުންދާ މައްސަލައާ ގުޅިގެންކަމަށް އިމިގްރޭޝަނުން ހާމަކުރެއެވެ.
އިމިގްރޭޝަނުން ހިންގަމުން އަންނަ އޮޕަރޭޝަނަކީ، ދީފައިވާ ހުއްދައިގެ ބޭރުން ރާއްޖޭގައި އުޅެމުން އަންނަ ބިދޭސީންނާއި ޤަވާއިދާ ޚިލާފަށް ކުދި އަދި މެދު ފަންތީގެ ވިޔަފާރި ކުރަމުން އަންނަ ބިދޭސީން ދެނެގަނެ، އިމިގްރޭޝަން ޤާނޫނުގެ ދަށުން ފިޔަވަޅު އެޅުމަށެވެ.
އެގޮތުން މި އޮޕަރޭޝަންގެ ތެރެއިން ފާއިތުވި އަހަރެއްހާ ދުވަހުގެ ތެރޭގައި 4000ށް ވުރެ ގިނަ ބިދޭސީން އަނބުރާ ޤައުމަށް ފޮނުވާލެވިފައިވާކަމަށާއި ސަރުކާރުގެ އަމާޒަކީ އެއް އަހަރު ދުވަހުގެ ތެރޭގައި 5000 ބިދޭސީން ޤައުމަށް ފޮނުވާލުން ކަމުގައި ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްޢާން ވަހީދު މި ފަހުން ވަނީ ވިދާޅުވެފައެވެ.
އަދި މި އަމާޒަށް ވާޞިލްވެވޭނެ ކަމުގެ ޔަޤީންކަން އެބަ އޮތްކަމުގައިވެސް އެބޭފުޅާ ވިދާޅުވިއެވެ.
