މޯލްޑިވްސް ބްރޮޑްކާސްޓިން ކޮމިޝަން (އެމްބީސީ) އާއި މޯލްޑިވްސް މީޑިއާ ކައުންސިލް (އެމްއެމްސީ) އެއްކޮށްލައި އެއް މުވައްސަސާއަކަށް ހަދައި ވަކި ވަކި ނޫސްވެރިން ޖޫރިމަނާކުރެވޭގޮތަށް ރައްޔިތުންގެ މަޖިލިހަށް ބިލެއް ހުށަހަޅައިފިއެވެ.
‘މި އުސޫލުތައް ކަނޑައެޅުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ޤާނޫނު’ ގެ ނަމުގައި ޤާނޫނެއް އުފެއްދުމަށް ރައްޔިތުންގެ މަޖިލިހުގެ ޖަލްސާއަށް ހުށަހެޅުއްވީ، ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރެވެ.
މި ބިލުގައި ވާގޮތުން ރާއްޖޭގައި ނޫސްވެރިކަމުގެ މިނިވަންކަން ކުރިއަރުވައި، ތަރައްޤީކޮށް ދެމެހެއްޓުމާއި ރާއްޖޭގައި ނޫސްވެރިކަމުގެ މިނިވަންކަން ދެމެހެއްޓުމާއެކު ބްރޯޑްކާސްޓް މީޑިއާ ހިމެނޭހެން، މީޑިއާގައި މަސައްކަތްކުރާ މީހުންނާއި ނޫސްވެރިންގެ ޒިންމާދާރުކަން އިތުރުކޮށް ބަލަހައްޓާނެ މިނިވަން އިދާރީ ނިޒާމެއް ޤާއިމުކުރުމަށް ހުށަހެޅުނު މި ބިލާއެކު އަލަށް އެކުލަވާލެވޭ ޤާނޫނުގެ ދަށުން އަލަށް އެކުލަވާލެވޭ ކޮމިޝަން ވެގެންދާނީ އަމިއްލަ ނަމުގައި ދައުވާކުރުމާއި ދައުވާ ލިބިގަތުމުގެ ބާރު ލިބިފައިވާ، އަދި އަމިއްލަ ނަމުގައި މުއާމަލާތް ކުރުމުގެ ހައިސިއްޔަތު ލިބިފައިވާ މިނިވަން ޤާނޫނީ ޝަޚުސަކަށެވެ.
އަލަށް އުފެއްދޭ ޤާނޫނާއެކު މިހާރު ޢަމަލުކުރަމުން އަންނަ ނޫސް މަޖައްލާ ފަދަ ތަކެތީގެ ޤާނޫނާއި މޯލްޑިވްސް މީޑިއާ ކައުންސިލްގެ ޤާނޫނު އުވިގެންދާނެއެވެ.
އަދި ބްރޯޑްކާސްޓްކުރުމުގެ ޤާނޫނުގެ ތިންވަނަ މާއްދާއިން ފެށިގެން 18 ވަނަ މާއްދާގެ ނިޔަލަށް، 20 ވަނަ މާއްދާއިން ފެށިގެން 37 ވަނަ މާއްދާގެ ނިޔަލަށް އަދި 42 ވަނަ މާއްދާއިން ފެށިގެން 45 ވަނަ މާއްދާގެ ނިޔަލަށް އުވޭނެއެވެ.
ިބިލް ޤާނޫނަކަށްވެ، އަމަލުކުރަން ފަށާ ހިސާބުން އެމްއެމްސީއާއި ބްރޯޑްކޮމް އުވާލައި އަދި އަލަށް އުފައްދާ ކޮމިޝަންގައި ތިބޭނީ 7 މެމްބަރުންނެވެ. އެއީ ރައްޔިތުންގެ މަޖިލީހުން ރުހުން ދީގެން ހޮވާ 4 މެމްބަރުންނާއި މީޑިއާތަކުން އައްޔަން ކުރާ ތިން މެމްބަރުންނެވެ. މި ކޮމިޝަންގެ ރައީސް އާއި ނައިބު ރައީސް ކަނޑައެޅުމުގެ ބާރު ދީފައިވަނީ ރައީސުލްޖުމްހޫރިއްޔާއަށެވެ.
މީގެ އިތުރުން ބިލުގައި ވާގޮތުން ކޮމިޝަން އެކުލަވާލާ މެންބަރުން ކޮމިޝަން ހިންގުމާ ހަވާލުވަންދެން, ކޮމިޝަނުގެ ކަންކަން ވަގުތީ ގޮތުން ހިންގާނީ ސިވިލް ސާވިސް ކޮމިޝަނުން އެކުލަވާލާ 5 މެންބަރުންގެ ވަގުތީ ކޮމިޓީއަކުންނެވެ.
އަދި މި ޤާނޫނުގެ ދަށުން ނޫސްވެރިކަމުގެ ސުލޫކީ މިންގަނޑުތަކެއް އެކުލަވައިލެވިގެން ދާއިރު، ސުލޫކީ މިންގަނޑު އެކުލަވައިލުމުން ތަކުރާރުކޮށް މިންގަނޑާ ޚިލާފުވާ މީޑިއާތައް ޖޫރިމަނާ ކުރުމާއި، ލައިސަންސް ހިފެހެއްޓުމާއި، މާފަށް އެދެން އެންގުން ފަދަ ބާރުތައް ވެސް އަލަށް އެކުލަވާލާ ކޮމިޝަނަށް ލިބެއެވެ.
ސުލޫކީ މިންގަނޑާ ތަކުރާރުކޮށް ޚިލާފުވެއްޖެ މީޑިއާއެއް ނަމަ 5،000 ރުފިޔާއާއި 50،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ. އަދި ވަކިވަކި ނޫސްވެރިން ވެސް 5،000 ރުފިޔާއާއި 10،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެކަމަށްވެސް މި ބިލުގައި ވަނީ ބުނެފައެވެ.
