ފުލުހުން ހިންގި ޚާއްސަ އޮޕަރޭޝަނެއްގައި މަސްތުވާ ތަކެއްޗާއެކު ތ ހިރިލަންދޫއިން ދެ މީހުން ހައްޔަރުކޮށްފިއެވެ.
މި މައްސަލައާއި ގުޅިގެން ފުލުހުން ހައްޔަރުކޮށްފައިވަނީ، ތ. ހިރިލަންދޫ / ޗަމަން އުމުރުން 37 އަހަރުގެ، އަޙްމަދު ސިނާނު އާއި މާލެ، މއ. ސީނަރީވިޔު، އުމުރުން 34 އަހަރުގެ އަޙްމަދު މަދީޙެވެ.
މި ދެމީހުން ހައްޔަރުކޮށްފައިވަނީ، އެރަށު ޕޮލިސް ސްޓޭޝަނުން ހިންގި ޚާއްސަ އޮޕަރޭޝަނެއްގައި ކޯޓު އަމުރެއްގެ ދަށުން، އެ ރަށު ގެއެއް ބަލައިފާސްކޮށްގެން ކަމުގައި ފުލުހުން ބުނެފައިވެއެވެ. އަދި އެ ގެ ބަލައި ފާސްކުރި ކުރުމުން މަސްތުވާތަކެތިކަމަށް ބެލެވޭ އެއްޗެއްހުރި 24 ރަބަރު ޕެކެޓު ފެނިފައިވާ ކަމަށް ފުލުހުން ބުނެފައިވާއިރު، މި މައްސަލައާއި ގުޅިގެން ހައްޔަރުކުރި ދެ މީހުންގެ ބަންދާމެދު ގޮތެއް ނިންމުމަށް ހިރިލަންދޫ މެޖިސްޓްރޭޓް ކޯޓަށް ހާޒިރުކުރުމުން ދެ މީހުން ވެސް ހަތް ދުވަހަށް ބަންދުކުރުމަށްއެ ކޯޓުން އަމުރުކޮށްފައިވާކަމަށް ފުލުހުން ބުނެއެވެ.
މި މައްސަލަ ހިރިލަންދޫ ޕޮލިސް ސްޓޭޝަނުން ގެންދަނީ އިތުރަށް ތަޙުޤީގުކުރަމުންނެވެ.
މަސްތުވާތަކެއްޗާއި ދެކޮޅަށް ފުލުހުން ހިންގަމުން އަންނަ އޮޕަރޭޝަންތަކުގައި މަސްތުވާތަކެއްޗާއެކު ގިނަ މީހުން ހައްޔަރުކުރާކަން ފާހަގަކޮށްލެވެއެވެ.
މިފަހުންވެސް ކަސްޓަމްސްއިން ވަނީ ކަނޑުމަގުން ރާއްޖެ އެތެރެކުރަން އުޅުނު 3.3 ކިލޯ ގްރާމްގެ މަސްތުވާތަކެތި އަތުލައިގެންފައެވެ.
