މަސްތުވާތަކެއްޗާއެކު އުމުރުން 65 އަހަރުގެ ދިވެހި ފިރިހެނަކު ހައްޔަރުކޮށްފިއެވެ.
މި މައްސަލައާއި ގުޅިގެން ހައްޔަރު ކުރީ ރ. އިންނަމޫދޫއަށް ނިސްބަތްވާ މީހެކެވެ.
އޭނާ ހައްޔަރުކޮށްފައިވަނީ ދިރިއުޅެމުން އައި އެޕަރޓްމަންޓުންނާއި އޭނާގެ ޖީބުން މަސްތުވާތަކެތި ކަމަށް ޝައްކު ކުރެވޭ އެއްޗިހި ފެނިގެން ކަމުގައި ފުލުހުން ބުނެފައިވެއެވެ.
އެގޮތުން އެ މިހާގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އެ ކޯޓުން ވަނީ އެ މީހާ 15 ދުވަހަށް ބަންދުކުރުމަށް އަމުރުކޮށްފައެވެ.
އެ ކޯޓުގެ ބަންދު އަމުރުގައި ބުނެފައިވަނީ، އޭނާގެ މައްޗަށް ކުށް ސާބިތުވާ ވަރަށް ކޮންމެވެސް މިންވަރަކަށް ހެކި ލިބިފައިވާކަމަށާއި އޭނާގެ ޖީބުންނާއި އޭނާ ހުރި އެޕާޓްމެންޓް ތެރެއިން މަސްތުވާތަކެތި ކަމަށް ޝައްކު ކުރެވޭ ތަކެތި ފެނިފައިވާކަން ފުލުހުންގެ ބަޔާނުން އެނގޭ ކަމަށެވެ.
ވުމާއެކު، މުޖުތަމައުގެ ސަލާމަތާއި ނުރައްކަލެއް ކުރިމަތިވެދާނެ ކަމަށް ބަލައި ކްރިމިނަލް ކޯޓުން ވަނީ އޭނާ ބަންދުކުރުމަށް ނިންމައިފައެވެ.
ދާދިފަހުންވެސް ވަނީ ރާއްޖެއަށް ތަކުރާރުކޮށް މަސްތުވާތަކެތި އެތެރެކުރަން އުޅުނު މައްސަލައެއްގައި މީހަކު ހައްޔަރުކޮށްފައެވެ. އަދި އެ މައްސަލައިގައި އޭނާއަށް ދައުވާ ކުރުމަށް ފޮނުވުމަށްވެސް ވަނީ ނިންމާފައެވެ.
