ރާއްޖެއަށް ދިމާވެފައިވާ ޑޮލަރުގެ ތާށިކަން ޙައްލުކުރުމަށް އެމްއެމްއޭއިން އެޅި ފިޔަވަޅުތަކުގެ ތެރޭގައި ހިމެނޭ، ރިސޯޓްތަކަށް ލިބޭ ޑޮލަރުގެ ތެރެއިން ވަކި މިންވަރެއް ބޭންކްތަކުން މާރުކުރަންޖެހޭ ގޮތަށް ހެދި ޤަވައިދު އުވާލުމަށް ޗަމްޕާ ބްރަދާސްގެ ވެރިޔާ މުހައްމަދު މޫސާ (އުއްޗު) ސަރުކާރަށް ގޮވާލައްވައިފިއެވެ.
ޗަމްޕާގެ ފަރާތުން އެމްއެމްއޭއަށް ފޮނުވި ސިޓީއެއްގައި ވަނީ، ރިސޯޓުތަކަށް އަންނަ ފަތުރުވެރިއެއްގެ ބޮލަކަށް 500 ޑޮލަރުގެ ރޭޓުން ރާއްޖޭގެ ބޭންކްތަކުން ޑޮލަރު މާރުކުރުމަކީ ވިޔަފާރިތަކަށް ބޮޑު ގެއްލުމަކާ ކުރިމަތިވެދާނެ ކަމެއް ކަމަށެވެ.
އަދި ފަތުރުވެރިކަމުގެ ދާއިރާއިން މިފަދަ ފިޔަވަޅެއް އެޅުމަކީ “ބޭއިންސާފެއް” ކަމަށެވެ.
މީގެ އިތުރުން ދާއިރާގައި މަސައްކަތް ކުރާ ފަރާތްތަކާއި މަޝްވަރާ ކުރުމެއް ނެތި މިފަދަ ނިންމުމެއް ނިންމުމާއި ޤަވާއިދަށް ތައްޔާރުވުމަށް ވަގުތު ނުދީ ޤަވާއިދު ގެޒެޓް ކުރި ދުވަހުން ފެށިގެން އަމަލުކުރަން ފެށުމަކީ އެންމެ ބޮޑު އެއް ކަންބޮޑުވުން ކަމުގައި އުއްޗު ބުނެފައިވެއެވެ.
އަދި މިފަދަ ޤަވާއިދެއް އެކުލަވާލުމުގައި ޓޫރިސްޓުން ރިސޯޓުގައި ހޭދަކުރާ މުއްދަތާއި ރިސޯޓުތަކުގެ ފެންވަރަށް ބެލުމެއް ނެތި ހުރިހާ ރިސޯޓަކަށް އެއް ރޭޓެއް ކަނޑައަޅާފައި އޮތުމުން ބައެއް ރިޒޯޓްތަކަށް ޚަރަދުކުޑަކުރުމަށް ފިޔަވަޅުތައް އެޅުމަށް މަޖުބޫރުވާނެ ކަމުގައި އުއްޗުގެ ސިޓީގައި ބުނެފައިވެއެވެ.
އެގޮތުން ން މުވައްޒަފުންނަށް ދޭ ބައެއް އިނާޔަތްތައް ކުޑަކުރުން ފަދަ ކަންކަން ކުރަން ޖެހި ދިގު މުއްދަތެއްގައި ޓޫރިޒަމް ސިނާއަތުގައި އިންވެސްޓްކޮށްގެން ތިބި ފަރާތްތަކަށް ލިބޭ ފައިދާ ދަށްވެ، އިންވެސްޓަރުންގެ އިތުބާރު މިކަމުގެ ސަބަބުން ރާއްޖޭގެ ޓޫރިޒަމް ދާއިރާއަށް ގެއްލިގެން ދާނެ ކަމަށް އުއްޗު ވަނީ ބުނެފައެވެ.
އެހެންކަމުން އެ ޤަވައިދަށް އަމަލުކުރުން މިހާރުން މިހާރަށް ހުއްޓާލުމަށް އަދި ރާއްޖޭގެ އިޤްތިސާދަށް ދެމެހެއްޓެނިވި ގޮތެއްގައި ފައިދާހުރި އަސަރުތަކެއް ކުރާނޭ ގޮތަށް ބޭރު ފައިސާގެ މުއާމަލާތައް ބެލެހެއްޓުމުގެ އުސޫލު ކަނޑައެޅުމަށް ވަނީ ސަރުކާރަށް އިލްތިމާސްކޮށްފައެވެ.
އެމްއެމްއޭ އިން އާންމުކުރި އާ ޤަވާއިދުގައިވާ ގޮތުން ކެޓަގަރީ އޭގެ ގޮތުގައި ހިމެނޭ ފަތުރުވެރިކަމުގެ ރިސޯޓުތަކާއި ހޮޓާތަކާއިި އުޅަނދުތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، އެ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ޖަމާކޮށް ރުފިޔާއަށް މާރު ކުރަން ވާނެއެވެ.
އަދި ކެޓަގަރީ ބީގެ ގޮތުގައި ހިމެނޭ ގެސްޓްހައުސްތަކާއި މީހުން ދިރިއުޅޭ ރަށްރަށުގައި ހިންގާ ހޮޓާތަކުގެ ތެރެއިން 50 ކޮޓަރި ނުވަތަ އެއަށް ވުރެ މަދު އަދަދެއްގެ ކޮޓަރި ރަޖިސްޓްރީކޮށްފައިވާ ތަންތަނުން ކޮންމެ ޓޫރިސްޓަކަށް، ބޮލަކަށް 25 ޑޮލަރުގެ ރޭޓުން އެ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ޖަމާކޮށް ރުފިޔާ އަށް މާރު ކުރަން ވާނެ ކަމަށް ވެސް އެމްއެމްއޭގެ ޤަވާއިދުގައި ބުނެފައިވެއެވެ.
