ކުރިން އެ މަސައްކަތަށް ކަނޑައެޅިފައިވާ އަގަށްވުރެ 80 މިލިޔަން ރުފިޔާ ކުޑަކޮށް އަރަބިއްޔާ ސްކޫލްގެ އަށް ބުރީގެ އިމާރާތުގެ މަސައްކަތް ފަށައިފިއެވެ.
ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑް (އާރްސީސީ) އާ ހަވާލުކޮށްގެ 540 ދުވަހުގެ ތެރޭގައި މަސައްކަތް ނިންމާ ޙަވާލުކުރާގޮތަށް މި މަސައްކަތް ފަށައިފައިވަނީ އިއްޔެ ހަވީރުގައެވެ.
ރާއްޖޭގައި ޢަރަބި އިސްލާމީ ތައުލީމު ފޯރުކޮށްދޭ އެންމެ ބޮޑު ސްކޫލް، ޢަރަބިއްޔާ ސްކޫލް އެންމެ ޒަމާނީ ފެންވަރަށް ތަރައްޤީކޮށް ފުޅާ ދާއިރާއެއްގައި ޢަރަބި ބަހުން ތައުލީމު ދެވޭ މަރުކަޒަކަށް އެ ސްކޫލް ހެދުމާއެކު، މާލެއިން އެކަށޭނަ ބޮޑު ބިމެއްގައި، ޖާގައިގެ ގޮތުން ތަނަވަސް، ޒަމާނީ އާ އިމާރާތެއް ބިނާކޮށް، އެތަނަށް ޢަރަބިއްޔާ ސްކޫލް ބަދަލުކުރުމަކީ ރައީސް، ޑރ. މުއިއްޒުގެ ‘ދިވެހީންގެރާއްޖެ’ މެނިފެސްޓޯގައި ހިމެނޭ ރިޔާސީ ވައުދުފުޅެކެވެ.
މި ވައުދުފުޅުގެ ދަށުން މި ސަރުކާރުގެ ކުރީ ކޮޅުގައި ޢަރަބިއްޔާގެ އިމާރާތް ބާ ޖަމާލުއްދީން ހުރި ބިމުގައި އެޅުމަށް 100 ދުވަހުގެ ތެރޭގައި މަސައްކަތް ނިންމާގޮތަށް ވަނީ އެހެން ކުންފުންޏަކާއެކު އެއްބަސްވުމެއް ހަދައިފައެވެ.
އެހެން ނަމަވެސް މާލޭގެ ތޮއްޖެހުން ބޮޑު ސަރަަހައްދަކަށް އެ ސްކޫލް ގާއިމްކޮށްފިނަމަ ތޮއްޖެހި ބޮޑު ތަކުލީފަކަށް ވެގެންދާނެތީ އެ ސްކޫލް ތަރައްޤީކުރަން އެހެން ބިމެއް ހަމަޖެއްސެވުމަށް ރައީސް ނިންމަވައި،އެހެނިހެން ސަބަބުތަކާވެސް ހުރެ އެ އެއްބަސްވުން ވަނީ ބާޠިލްކޮށްލައިފައެވެ.
މިހާރު އެ އިމާރާތް އެޅުމަށް މަސައްކަތް ފަށައިފައިވަނީ، ވަނީ ޖާގަ ތަނަވަސް ބިމެއް ކަމަށްވާ މާފަންނު ސްޓޭޑިއަމް ކައިރީގައި ހުންނަ 386 ކޮށި ބިމުގައެވެ.
އެގޮތުން މި މަސައްކަތް މިހާރު ހަވާލުކުރެވިފައިވާ އަގާއި ގުޅިގެން އެޑިއުކޭޝަން މިނިސްޓަރ އިސްމާއީލް ޝަފީޢު ވިދާޅުވީ، މިހާރުގެ އަގަކީ ކުރިން މި މަސައްކަތް ހަވާލުކުރި ފަރާތަށް ވުރެ 83 މިލިއަން ރުފިޔާ ހެޔޮ އަގެއް ކަމަށާއި ވުމާއެކު ޢަރަބިއްޔާގެ އިމާރާތް ނޭޅި މި އައި ލަސްވުމަކީ ރައްޔިތުންގެ ފައިސާ ސަލާމަތް ކުރެވިގެން ދިޔަ ލަސްވުމެއް ނަމަ އެއީ ބަލައިގަނެވޭ ލަސްވުމެއްކަމުގައި ބުނެވިދާނެކަމަށެވެ.
މާލޭގެ 100 އިންސައްތަ ސޯލާ ހަކަތަ ބޭނުން ކުރަމުންދާނެ ފުރަތަަމަ ސްކޫލުގެ ގޮތުގައި ޢަރަބިއްޔާ ސްކޫލުވެގެންދާނެ ކަން ފާހަގަކުރައްވައި މިނިސްޓަރ އިތުރަށް ވިދާޅުވީ، ސްކޫލް ފަރުމާ ކުރެވެވިފައި ވާނީ އެއްކޮށް އޭސީ ކުރެވޭ ގޮތަށް އަދި ސޯލަރ ޕެނަލްވެސް ހަރުކުރެވޭގޮތަށް ކަމަށެވެ.
މީގެ އިތުރުން މި މަޝްރޫއުގެ ކޮންކްރީޓް މަސައްކަތް ދެ މަސް ދުވަހުގެ ތެރޭގައި ފެންނަން ފަށާނެ ކަމަށާއި އޭގެ ކުރިން ލޭންޑް ފިލިންގ މަސައްކަތްތަކާއި، އެ ނޫންވެސް ކަންކަން ފެށިގެން ކުރިއަށްދާނެކަމަށްވެސް މިނިސްޓަރ ވަނީ ވިދާޅުވެފައެވެ.
މި ސްކޫލުގައި 40 ކްލާސްރޫމާއި، ބޭސްމެންޓްގައި އަންޑަރ ގްރައުންޑް ޕާރކިންގް ޒޯނަކާއި، ޓަރފް ދަނޑެއް ހިމެނޭނެއެވެ.
