ރާއްޖެ ސަރަހައްދުގައި ހުޅަނގު މޫސުން ފެށޭ ދުވަސްވަރާއި ދިމާކޮށް އުފެދިފައިވާ ލޯވެލެލް ސާރކިއުލޭޝަންއަކާއި ގުޅިގެން ރާއްޖެއަށް މިހާރު ކުރަމުން އަންނަ ވިއްސާރައިގައި މޫސުން އިތުރަށް ގޯސްވެ، ބ އަތޮޅުން ފެށިގެން އދ އަތޮޅާއި ދެމެދުގެ ސަރަހައްދަށް ރީނދޫ ސަމާލު ނެރެފިއެވެ.
މޫސުމާއި ބެހޭ ޤައުމީ އިދާރާއިން މިއަދު 12:00އި ހަމައަށް ނެރުނު ރީނދޫ ސަމާލުގައި ބުނެފައިވަނީ، އެ ސަރަހައްދަށް ބޯކޮށް ވާރޭ ވެހި ގުގުރާނެ ކަމަށް ލަފާކުރެވޭ ކަމަށާއި ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެ ކަމަށް ލަފާ ކުރެވޭ ކަމަށެވެ.
މީގެ އިތުރުން މިއަދު މެންދުރު 14:00އި ހަމައަށް ރ. އަތޮޅުން ފެށިގެން ލ. އަތޮޅާއި ދެމެދުގެ ސަރަހައްދުތަކަށް މޫސުމާއި ބެހޭ ޤައުމީ އިދާރާއިން ނެރުނު ހުދު ސަމާލުގައި ވަނީ އެ ސަރަހައްދުތަކަށް ބޯކޮށް ވާރޭ ވެހުމާއެކު ގުގުރާނެ ކަމަށް ލަފާ ކުރެވޭ ކަމަށެވެ.
މެޓް އޮފީހުން ބުނެފައިވަނީ މިއަދުގެ ކުރިއަށް ހުރި ވަގުތުތަކުގައިވެސް ރާައްޖޭގެ އެކި ހިސާބަށް ވިއްސާރަ ކުރުމާއެކު، ގުގުރާނެ ކަމަށް ލަފާ ކުރެވޭކަމަށެވެ.
އަދި ބައެއް ރަށްތަކަށް ބޯކޮށް ވާރޭ ވެހުންވެސް އެކަށީގެންވާ ކަމަށާއި ދެކުނުގެ ކަނޑުތައް އާދައިގެ ވަރަކަށް ގަދަވެ، ވިލާގަނޑުގައި ކަނޑުތައް ގަދަވާނެ ކަމަށްވެސް އެއިދާރާއިން ލަފާކުރެއެވެ.
ވިއްސާރަ ދުވަސްވަރު ކަނޑު ދަތުރުކުރާ ފަރާތްތަކުން ކަނޑުމަތީގައި ދިމާވެދާނެ ހާދިސާއަކަށް ރައްކާތެރިވެ ދަތުރަށް ފެށުމުގެ ކުރިން މޫސުން ކުރިއަށް ލަފާކުރާ ގޮތް ސާފުކުރުމަށް އެ އދާރާއިން އިލްތިމާސްކުރެއެވެ.
