ރާއްޖޭގައި ޙަރަކާތްތެރިވާ ނަން މަޝްހޫރު ބޮޑެތި ހުރިހާ ގޭންގްތަކެއް ހުއްޓުވުމުގެ ޤަބިލްކަމާއި ގަޓު މި ސަރުކާރުގައި ހުރި ކަމަށާއި އެކަން ކުރާނެ ކަމުގައި ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
ސަރުކާރަށް އެއް އަހަރު ފުރުން ފާހަގަކުރުމުގެ ގޮތުން ދައުލަތުގެ މީޑިޔާއިން ވަކި ވަކި މިނިސްޓަރުންނާއެކު ގެންނަމުންދާ ޚާއްސަ އެކްސްކްލޫސިވް އިންޓަރވިއުގައި ވާހަކަދައްކަވަމުން މިނިސްޓަރ ވިދާޅުވީ، ރާއްޖޭގައި އުޅޭ ބޮޑެތި ހުރިހާ ގޭންގްތައް ހުއްޓުވާނެ ކަމުގެ ހިއްވަރު މިހާރުގެ ރައީސްގެ ކިބައިގައި ހުރިކަމުގެ 100 އިންސައްތަ ޔަޤީންކަން މިހާރު އެބަ އޮތް ކަމުގައެވެ.
މީގެ އިތުރުން ޤާނޫނުތައް ތަންފީޒުކުރުމަށް މިހާރުގެ ސަރުކާރުން ގެންގުޅޭ ތަޞައްވުރު ނިމިދިޔަ ސަރުކާރުތަކުން ވެސް ގެންގުޅުނު ނަމަ ގޭންގުތަކުގެ ބިރުވެރިކަން މިހާރު އޮތް ވަރަށް ބޮޑު ނުވާނެކަން ފާހަގަކުރައްވައި މިނިސްޓަރ ވިދާޅުވީ، ރައީސްގެ ކޮންމެ ނިންމެވުމެއް ފުރިހަމަ އަށް ތަންފީޒުކުރުމަށް ހޯމް މިނިސްޓްރީންނާއި އަދި ދިވެހި ފުލުހުން އަބަދުވެސް ތިބޭނީ ތައްޔާރަށް ކަމުގައެވެ.
މީގެ އިތުރުން މިހާރު އޮތް ގޭންގް ނުރައްކާ އެވަރަށް ބޮޑުވެ އެ މީހުން އެހާ ހަރަކާތްތެރި ބަޔަކަށް ވީ، ފާއިތުވި ސަރުކާރުތަކުގައި އެ ފަރާތްތަކަށް އެ އެއްބާރުލުމާއި ބާރުވެރިކަން ދިނުމުގެ ސަބަބުން ކަމުގައި މިނިސްޓަރ ފާހަގަކުރެއްވިއެވެ.
ހަމައެޔާއެކު ރާއްޖޭގެ އަދުގެ ހާލަތަށް ބަލާއިރު ކުށުގެ މާހައުލުގައި އުމުރުން 12، 13 އަހަރުގެ ކުދީން ހަރަކާތްތެރިވަމުން އަންނަ ކަން ފާހަގަކުރައްވި މިނިސްޓަރ ވިދާޅުވީ، އެކަމުގެ އެންމެ ބޮޑު ސަބަބަކަށް ވަނީ އެކުދިން ދިރިއުޅޭ މާހައުލުކަން ކުރެވުނު ދިރާސާތަކުން ދައްކާ ކަމަށެވެ.
ވުމާއެކު ޖިނާއީ ކުށުގެ ޒިންމާ ނަގަންޖެހޭ އުމުރު 12 އަހަރަށް ތިރިކުރުމަށް ކެބިނެޓުން ނިންމައި އެ އިސްލާހު މިހާރު ޑްރާފްޓްކޮށް އޭޖީ އޮފީހަށް ފޮނުވުމުގެ ތައްޔާރީތައް ވަމުން އަންނަކަމަށް ކަމުގައި މިނިސްޓަރ އިހްސާންގެ ވާހަކަފުޅުގައި ފާހަގަކުރެއްވިއެވެ.
