ރާއްޖޭގައި ބޭރުގެ އެއްވެސް ޤައުމެއްގެ އަސްކަރީ ސިފައިން ތިބޭ ނަމަ ރައްޔިތުންގެ މަޖިލިހުގެ އަޣުލަބިއްޔަތުން ރުހުން ލިބިގެން މެނުވީ އެކަން ނުކުރެވޭގޮތަށް ޤާނޫނު އިސްލާހުކުރުމަށް ހުށަހަޅައިފިއެވެ.
މި ބިލް ރައްޔިތުންގެ މަޖިލިހަށް ހުށަހެޅުއްވީ، ސަރުކާރުގެ ފަރާތުން ހުޅުދޫ ދާއިރާގެ ޕީއެންސީގެ މެމްބަރު މުހައްމަދު ޝާހިދެވެ.
ޤާނޫނުއަސާސީގެ 251 ވަނަ މާއްދާގެ (ނ) އަށް އިސްލހު ގެނައުމަށް ހުށަހެޅި މި ބިލުގައި ބުނެފައިވަނީ، ރާއްޖޭގައި ބޭރުގެ އަސްކަރީ އެއްވެސް ސިފައިންގެ ބަޔަކަށް ތިބުމަށް ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްކޮށްގެން އެކަމަށް ހުއްދަ ދޭން ޖެހޭނެ ކަމަށާއި އަދި ހަމަ އެފަދައިން ހުއްދަ ލިބިގެން މެނުވީ ރާއްޖޭގެ އިޚްތިޞާސްގައި ހިމެނޭ އެއްވެސް ތަނެއް، ސަރަހައްދެއް ބޭރުގެ އަސްކަރީ އެއްވެސް ބޭނުމަކަށް ދީގެން ނުވާނެ ކަމަށެވެ.
މި މާއްދާއަށް ގެނެވޭ އިސްލާހާއެކު އެއްބަސްވުމެއްގެ ދަށުން ނުވަތަ އެ ނޫން ވެސް ގޮތަކަށް ރާއްޖެއިން ބޭރުގެ ފަރާތަކަށް ރާއްޖޭގެ ސަރަހައްދުން އަސްކަރީ ބޭނުމަށް ބޭނުން ކުރުމުގެ ހުއްދަ ނުދެވޭނެއެވެ.
އެހެން ނަމަވެސް ރާއްޖެއާއި މެދު ވެވޭ އެއްބަސްވުމެއްގެ ދަށުން ހިންގާ އަސްކަރީ ތަމްރީނުތައް މީގެ ތެރެއިން އިސްތިސްނާވެގެންދާނެ ކަމަށް އެ ބިލުގައި ވަނީ ބުނެފައެވެ.
ރާއްޖޭގައި މިދިޔަ މެއި މަހުގެ 10 އާ ގެ ކުރިން، އިންޑިއާ ސިފައިން ތިއްބެވެ. އެއީ އިންޑިއާ އިން ހަދިޔާކޮށްފައިވާ ދެ ހެލިކޮޕްޓަރާއި ޑޯނިއާ މަތިންދާ ބޯޓު ދުއްވުމަށް އައިސް ތިބި މީހުންނެވެ. އެކަމަކު، ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެން ސިފައިން ވަނީ ރާއްޖެ އިން ފޮނުވާލައިފައެވެ. އެއީ ރައީސް ޑރ މުޙައްމަދު މުޢިއްޒު، ރިޔާސީ އިންތިޚާބުގެ ކެމްޕެއިންގެ ތެރޭގައިވެސް އެންމެ ފާޅުކަން ބޮޑުގޮތެއްގައި ކުރައްވާނެކަމަށް ވިދާޅުވެ ވެ ވަޑައިގެންނެވި އެންމެ ފާހަގަކޮށްލެވޭ ވަޢުދުފުޅުވެސް މެއެވެ.
