މާލޭ މަގުމަތިން ހިނގާފައި ދިޔަ ބިދޭސީ މިހަކަށް ވަޅިން ޙަމަލާދީ ބިރުދެއްކުމަށްފަހު އެމީހާގެ އަތުން ގިނަ އަދަދެއްގެ ފައިސާ ފޭރުނު މީހަކު ހައްޔަރުކޮށްފިއެވެ.
އެގޮތުން ތޫނު ހަތިޔާރު ބޭނުންކޮށްގެން ފޭރުމުގެ ތުހުމަތުގައި ފުލުހުން ހައްޔަރުކޮށްފައިވަނީ، މާލެއަށް ނިސްބަތްވާ އުމުރުން 33 އަހަރުގެ ދިވެހި ފިރިހެނެކެވެ.
އެގޮތުން އޭނާ ވަނީ އެ ބިދޭސީ މީހާގެ އަތުން ޖުމުލަ 6000 ރުފިޔާ ފޭރިގަނެފައެވެ.
އަދި ބިދޭސީ މީހާއަށް ޙަމަލާދީ އޭނާގެ އަތުން ފޭރުނު މަންޒަރު އަދި ފޭރުމަށްފަހު ދުވެފައިދިޔަ މަންޒަރުވެސް ސީސީޓީވީ ފޫޓޭޖަށް ވަނީ އަރައިފައެވެ.
އޭނާއަކީ ފޭރުމުގެ ރެކޯޑް އޮންނަ މީހެކެވެ. އޭނާގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އެކޯޓުން ވަނީ އޭނާ 15 ދުވަހަށް ބަންދުކުރުމަށް އަމުރުކޮށްފައެވެ.
ފާހަގަކޮށްލަން ޖެހޭ ގޮތުގައި މާލެ ސަރަހައްދުގައި ފޭރުން އާންމުވެ މި ފަހުން އެ ފަދަ މައްސަލަތަކުގައި ރިޕޯޓް ކުރާ މިންވަރު އިތުރުވެފައިވާކަން ފާހަގަކޮށްލެވެއެވެ.
