ކަނޑައެޅޭ އުސޫލުތަކެއްގެ ދަށުން އިންޑިޔާއާއި ރާއްޖެއާއި ދެ ޤައުމުގައި ދެ ޤައުމުގެ ވެސް ފައިސާ ބޭނުންކުރެވޭ އެއްބަސްވުމެއްގައި އެމްއެމްއޭއިން ބޭންކް އޮފް އިންޑިއާ (އާރުބީއައި)އާއެކު ސޮއިކޮށްފިއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ފަރާތުން މިއެއްބަސްވުމުގައި ސޮއިކުރެއްވީ، ގަވަރުނަރު އަހުމަދު މުނައްވަރެވެ. އަދި އާރުބީއައިގެ ފަރާތުން ސޮއިކުރެއްވީ އެ ބޭންކުގެ ގަވަރުނަރު ޝްރީ ޝަކްތިކަންދާ ދާސްއެވެ.
މިއެއްބަސްވުމާއި ގުޅިގެން އެމްއެމްއޭއިން ނެރުނު ބަޔާނެއްގައި ބުނެފައިވަނީ، މިއެއްބަސްވުމުގެ ދަށުން ކަރަންޓް އެކައުންޓް މުއާމަލާތްތަކުގައި އާއި ހުއްދަކުރެވޭ ކެޕިޓަލް އެކައުންޓް މުއާމަލާތްތަކާއި އެހެނިހެން ވެސް އިޤްތިޞާދީ އަދި މާލީ މުއާމަލާތްތައް ދެ ޤައުމުން އެއްބަސްވާ ގޮތެއްގެ މަތިން ދިވެހި ރުފިޔާއާއި އިންޑިއާ ރުޕީން ކުރުމަށް ބާރުއެޅިގެންދާނެ ކަމަށެވެ.
ހަމައެޔާއެކު ދެ ޤައުމުގެ ދެމެދުގައި ކުރެވޭ ވިޔަފާރީގެ މުޢާމަލާތްތަކުގައި އެ ޤައުމެއްގެ އަމިއްލަ ފައިސާއިން ވިޔަފާރީގެ މުޢާމަލާތްތައް ކުރުމުގެ މަގު، މި އެއްބަސްވުމާއެކު ފަހިވެގެން ދާނެކަމުގައި ވެސް އެމްއެމްއޭގެ ބަޔާނުގައި ބުނެފައިވެއެވެ.
އެ ބޭންކުން އިތުރަށް ބުނެފައިވަނީ، މިކަމުގެ ސަބަބުން ފޮރިން އެކްސްޗޭންޖް މާކެޓުގައި މި ދެ ފައިސާ ޓްރޭޑް ކުރުމުގެ ފުރުސަތު ހުޅުވުމުގެ އިތުރުން ޤައުމުތަކުގެ އަމިއްލަ ފައިސާ ބޭނުންކުރެވޭ ގޮތް ވުމުން ޚަރަދު ކުޑާވެ ސެޓްލްމަންޓް ހިނގާ ވަގުތު އަވަސްވެގެން ދާނެ ކަމަށެވެ.
ރާއްޖޭގެ ދަރަނި ބޮޑުވެ ޑޮލަރުގެ ތާށިކަން ކުރިމަތިވެފައިވާއިރު، މި ސަރުކާރުން އަންނަނީ ބޭރު ގައުމުތަކާއެކު ކުރާ ވިޔަފާރީގައި އަމިއްލަ ފައިސާ ބޭނުންކުރެވޭނެ ގޮތްތައް ހަމަޖެއްސުމަށް މަސައްކަތް ކުރަމުންނެވެ.
