ރާއްޖޭގައި ހެލިކޮޕްޓަރު އޮޕަރޭޓް ކުރުމަށް ކުރަމުން އަންނަ މަސައްކަތްތަކުގެ ތެރެއިން އަންނަ އަހަރުގެ މާރޗް މަހުގެ ތެރޭގައި އެކަން އަމަލީގޮތުން ފެށިގެންދާނެ ކަމުގައި މަދަނީ އުފުހުންތަކާއި ބެހޭ ވަޒީރު، މުހައްމަދު އަމީން ވިދާޅުވެއްޖެއެވެ.
ސަރުކާރަށް އެއް އަހަރުވުން ފާހަގަކުރުމުގެ ގޮތުން ދައުލަތުގެ މީޑީޔާ ޕީއެސްއެމުން ގެނެސްދެމުން އަންނަ ހަފްތާ 52 ޕްރޮގްރާމްގައި ވާހަކަ ދައްކަވަމުން ވަޒީރު ވިދާޅުވީ، އެންމެ ޒަމާނީ ބަދަލުތައް ފަތުރުވެރިކަމުގެ ދާއިރާއަށް ގެނައުމަށް އެންމެ މުހިއްމު އެއް ބަދަލަކީ ހެލިކޮޕްޓަރުގެ ޚިދުމަތް ކަމަށެވެ. އެގޮތުން ހެލިކޮޕްޓަރުގެ ޚިދުމަތަކީ އެންމެ ޒަމާނީ އަދި ފަތުރުވެރިކަމުގެ ދާއިރާއާއި ބަލި މީހުން އުފުލުމުގައި ވިއަސް މިއަދުގެ ހާލަތަށް ބަލާއިރު ސަލާމަތީ ގޮތުން އެންމެ ރަނގަޅު އެއް ޚިދުމަތް ކަމުގައި ވަޒީރު ވިދާޅުވިއެވެ.
މި ޚިދުމަތް ރާއްޖޭގައި ދޭނެ ފަރާތެއް ހޯދުމަށް ހުޅުވާލި ފުރުސަތުގައި 32 ފަރާތަކުން އެކަމަށް ޝައުޤުވެރިކަން ފާޅުކުރިކަމަށްވެސް ވަޒީރު ވިދާޅުވިއެވެ. އެގޮތުން އެ ޚިދުމަތް ރާއްޖޭގައި އޮޕަރޭޓްކުރުމުގެ މަސައްކަތް ކުރުމަށް ހަމަޖެހިފައިވާ ފަރާތާއެކު އެކަމުގެ އެއްބަސްވުމުގައި ކުރިއަށް އޮތް 15 ވަރަކަށް ދުވަސްތެރޭގައި ސޮއިކުރެވިގެންދާނެ ކަމުގައި މިނިސްޓަރ ވިދާޅުވިއެވެ.
އަދި މި ހުރިހާ ވިޔަވަޅުތައް ފުރިހަމަކުރެވި އަންނަ އަހަރުގެ މާރޗް މަހުގެ ތެރޭގައި އެ ޚިދުމަތް ދޭން ފެށެ ވަރުވާނެކަމުގައިވެސް ވަޒީރު އަމީންގެ ވާހަކަފުޅުގައި ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، އެ ބަދަލަކީ އިނގިރޭސިވިލާތުގެ ސީއޭގެ ރިކޮމެންޑޭޝަންސްތަކާއެކީ ކުރެވިގެންދާ ކަމެއް ކަމަށާއި އަދި އެކަމަށް ބޭނުން ކުރާނީ ސަލާމަތީ ގޮތުން ރާއްޖެއަށް އޮޕަރޭޓް ކުރުމަށް އެންމެ ރަނގަޅު ހެލިކަޕްޓަރު ކަމަށެވެ.
ހެލިކަޕްޓަރު އޮޕަރޭޝަން ފެށުމުގެ ރަށްރަށުން މާލެއަށް ބަލި މީހުން ގެނައުމަށް ދިމާވެފައިވާ ދަތިތަކާއި، ފަތުރުވެރިންނަށް ރޭގަނޑު ދަތުރު ކުރުމުގައި ދިމާވެފައިވާ ދަތިތަކަށް ހައްލު ލިބިގެންދާނެ ކަމަށް ގަބޫލު ކުރައްވާ ކަމަށްވެސް ވަޒީރު ވަނީ ވިދާޅުވެފައެވެ.
ރާއްޖޭގައި އަލުން ހެލިކޮޕްޓަރުގެ ޚިދުމަތް ފެށުމަށް ނިންމާފައިވަނީ މި އަހަރުގެ ޖެނުއަރީމަހުގެ ތެރޭގައި ކެބިނެޓުންނެވެ.
