ރާއްޖޭގެ ޒަކާތު ފަންޑުން ގާޒާގެ ރައްޔިތުންނަށް ހަދިޔާކުރަން ނިންމާފައިވާ 100،000 ޑޮލަރު، ގަތަރު ރެޑް ކްރެސެންޓް ސޮސައިޓީ އާއި ހަވާލުކޮށްފިއެވެ.
މި ފައިސާ ގަތަރު ރެޑް ކްރެސެންޓް ސޮސައިޓީ އާއި ހަވާލުކޮށްފައި ވަނީ މިއަދު ބޭއްވި ރަސްމިޔާތެއްގައި އޮންލައިންކޮށް ދެ ފަރާތުގެ ދެމެދުގައި އެކަމުގެ އެއްބަސްވުމެއްގައި ސޮއިކުރެވިގެންނެވެ.
މި އެއްބަސްވުމުގައި އިސްލާމީ ކަންތައްތަކާ ބެހޭ ވުޒާރާގެ ފަރާތުން ސޮއިކުރެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދުއެވެ. އަދި ގަތަރު ރެޑްކްރެސެންޓް ސޮސައިޓީގެ ފަރާތުން ސޮއިކުރެއްވީ ސެކްރެޓަރީ ޖެނެރަލް ފައިސަލް މުހައްމަދު އަލްއެމަދީއެވެ.
ދެ ފިޔަވައްސަކަށް ބަހާލައިގެން ދިނުމަށް ހަމަޖެހިފައިވާ މި ފައިސާ ހަރަދުކުރުމަށް ހަމަޖެހިފައިވަނީ ގާޒާގެ ރައްޔިތުންނަށް ސާފު ބޯފެން ފޯރުކޮށްދިނުމަށް ގަތަރު ރެޑްކްރެސެންޓް ސޮސައިޓީން ކުރިއަށް ގެންދާ މަޝްރޫއުއަށެވެ.
މިއީ ޒަކާތު ފަންޑުން ރާއްޖޭން ބޭރުގެ ފަރާތަށް އެހީތެރިކަން ފޯރުކޮށްދޭ ފުރަތަމަ ފަހަރުކަން ފާހަގަކޮށްލެވެއެވެ.
ފަލަސްތީނު ރައްޔިތުންނަށް އެހީވުމަކީ ރައީސް، ޑރ. މުޙައްމަދު މުޢިއްޒުގެ އިރުޝާދުގެ ދަށުން ކުރިއަށް ގެންދެވޭ ކަމެއް ކަމަށް ވެސް އިސްލާމިކް މިނިސްޓްރީން ވަނީ ބުނެފައެވެ.
މީގެ ކުރިން, ‘ފަލަސްތީނާ އެކު ދިވެހީން’ ނަމުގައި ދައުލަތުގެ މީޑިއާ، ޕީއެސްއެމުން ކުރިއަށް ގެންދިޔަ ޓެލަތޯނަކަށް 19 މިލިއަން ރުފިޔާ ލިބިފައިވެއެވެ.
