ރާއްޖޭގައި ފުރަތަމަ ފަހަރަށް ބާއްވާ ބައިނަލްއަޤްވާމީ ޒަކާތު ކޮންފަރެންސް ފަށައިފިއެވެ.
މޯލްޑިވްސް ޒަކާތު ހައުސްއިން ކުރިއަށް ގެންދާ މި ކޮންފަރެންސް ކުރިއަށްދަނީ އިސްލާމީ މަރުކަޒުގެ ޖަލްސާކުރާ މާލަމުގައެވެ.
ރާއްޖެ އާއި ރާއްޖެ އިން ބޭރުގެ ޒަކާތުގެ ޢިލްމާއި ގުޅޭ ބޭފުޅުން ބައިވެރިވަޑައިގަންނަވާ މި ކޮންފަރެންސަކީ ދެމެހެއްޓެނިވި ގޮތެއްގައި ރާއްޖޭގައި ޤާއިމުކުރެވިފައިވާ ޒަކާތުގެ ނިޒާމް ކުރިއެރުވުމުގެ މަޤްޞަދުގައި ކުރިއަށް ގެންދާ ކޮންފަރެންސެއްކަމަށް ޒަކާތު ހައުސްއިން މައުލޫމާތު ދެއެވެ.
މި ކޮނެފަރެންސް ބޭއްވުމުގެ އަމާޒުތަކުގެ ތެރޭގައި ރާއްޖޭގެ އިޖްތިމާއީ އަދި އިޤްތިޞާދީ މައިދާނަށް ފެތޭ ގޮތަށް، އަވަސް އަދި ފަސޭހަ ގޮތަކަށް ޚިދުމަތްދެވޭ ޒަކާތުގެ އޮނިގަނޑެއް ޤާއިމުކޮށް، މި ނިޒާމުގެ ތެރެއިން ދެމެހެއްޓެނިވި ތަރައްޤީއަށް މަގުފަހިކޮށްދިނުން ހިމެނެއެވެ.
މި ކޮންފަރެންގެ ތެރެއިން ޢިލްމުވެރިންނާއި، މި މަސައްކަތުގައި އުޅޭ މީހުންނާއި ސިޔާސަތުތައް ކަނޑައަޅާ ފަރާތްތަކާއި، މުޖުތަމަޢުގެ އިސްވެރީން ގުޅިގެން، އިޖްތިމާޢީ ދުޅަހެޔޮކަމާއި އިޤްތިޞާދީ ހަމަޖެހުމަށް ޓަކައި މުހިންމު ވަސީލަތެއްގެ ގޮތުގައި ޒަކާތުގެ ހިންގުން ހަރުދަނާކޮށް، ހަރުދަނާކަން އިތުރުކުރެވޭނެ އިސްތިރާޖުތައް ދެނެގަތުމަށް ހަމަޖެހިފައިވާއިރު، ޕެނެލިސްޓުންގެ ގޮތުގައި ރާއްޖޭގެ މަޝްހޫރު ދީނީ އިލްމުވެރިންނާއި، އިސްލާމިކް ފައިނޭންސްއާއި އިޤްތިސާދީ ދާއިރާގެ މާހިރުން ބައިވެރިވެލައްވާ ގޮތަށް ހަމަޖެހިފައިވާކަމަށް ޒަކާތު ހައުސްއިން މައުލޫމާތު ދެއެވެ.
މިދިޔަ އަހަރުގެ ޑިސެމްބަރު މަހުގެ 15 ވަނަ ދުވަހު މޯލްޑިވެސް ޒަކާތު ހައުސްގެ ނަމުގައި ވަކި މުއައްސަސާއެއް އުފެއްދެވުމަށް ނިންމެވީ މިހާރުގެ ރައީސް ޑރ މުޙައްމަދު މުއިއްޒެވެ.
