ދިވެހި ޤައުމިއްޔަތު ދިރުވައި އާލާކުރުމުގެ ދިރާސީ މަސައްކަތްތައް ކުރުމަށް އުފެއްދި ދިވެހި ޤައުމިއްޔަތުގެ އިސްވަރުގެ ފުރަތަމަ މަހާސިންތާ މިހަފްތާގެ ހޮނިހިރު ދުވަހު ބޭއްވުމަށް ނިންމައިފިއެވެ.
މި މަހާސިންތާއާއި ބެހޭގޮތުން މައުލޫމާތު ދެމުން ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ބުނީ، “ކަޅުއޮށްފުންމި – ދިވެހި ގައުމިއްޔަތުގެ ދަރުބާރު” ގެ ނަމުގައި ބާއްވާ މި މަހާސިންތާއަކީ ހުޅަނގު މޫސުމާއި އިރުވައި މޫސުމުގައި ބާއްވާ ދެ މަހާސިންތާ ގެ ފުރަތަމަ މަހާސިންތާ ކަމުގައެވެ.
ދިވެހިރާއްޖޭގެ އިސްލާމީ ޔުނިވާސިޓީގެ ހޯލުގައި ހޮނިހިރު ދުވަހު ހެނދުނު 9:00 ގައި ފެށުމަށް ހަމަޖެހިފައިވާ މި މަހާސިންތާ ފެށުމުގެ ރަސްމިއްޔާތު ޝަރަފުވެރިކޮށްދެއްވުމަށް ހަމަޖެހިފައިވަނީ، ނައިބްރައީސް ހުސައިން މުހައްމަދު ލަތީފްކަމަށް އެ ވުޒާރާ އިން ބުނެއެވެ.
ތިން ދަންފަޅިއަކަށް ބަހާލައިގެން ކުރިއަށް ގެންދިއުމަށް ހަމަޖެހިފައިވާ މި ދަރުބާރުގައި އެކި ދާއިރާތަކުގެ އިލްމީ ތަޖުރިބާކާރުން ބައިވެރިވެވަޑައިގަންނަވާނެއެވެ.
ތަފާތު ޢިލްމީ ނުވަ ކަރުދާހެއް ހުށަހެޅުމަށް ހަމަޖެހިފައިވާއިރު، ރާއްޖެއަށް އިސްލާމްދީން ތައާރަފުވުމާއި ތަރައްޤީ ވެގެން އައި ގޮތާ ބެހޭ ދިރާސާތަކާއި، ދިވެހިބަސް، ސަގާފަތް އަދި އިހުގެ އިސްލާމީ ފަރުމާތަކާ ބެހޭ ދިރާސީ ހުށަހެޅުންތައް ވެސް އޭގެ ތެރޭގައި ހިމެނެއެވެ.
