ރާއްޖޭގެ އެކި ހިސާބުތަކަށް ކުރަމުންދާ ވިއްސާރައިގައި މޫސުން އިތުރަށް ގޯސްވެދާނެ ކަމަށް ލަފާކޮށް ރާއްޖޭގެ އުތުރާއި ދެކުނުގެ ސަރަހައްދުތަކަށް، މޫސުމާއި ބެހޭ ޤައުމީ އިދާރާއިން ހުދު ސަމާލު ނެރެފިއެވެ.
މޫސުމާއި ބެހޭ ޤައުމީ އިދާރާއިން ހއ އަތޮޅުން ފެށިގެން ރ. އަތޮޅާއި ހަމައަށާއި ލ. އަތޮޅުން ފެށިގެން އައްޑޫސިޓިއާއި ހަމައަށް ހުދު ސަމާލު ނެރެފައި ވަނީ، މިއަދު ހެނދުނު 6:35 އިން މެންދުރު 12:30 އާއި ހަމައަށެވެ.
އެ އިދާރާއިން ނެރުނު ހުދު ސަމާލުގައި ބުނެފައި ވަނީ، މި ވަގުތުތަކުގައި ބޯކޮށް ވާރޭވެހުމާއެކު ގުގުރުން، އަދި ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި ވިލާގަނޑުގައި ގަޑިއަކު 45 މޭލަށް ވައިގަދަވެ، ކަނޑުތައް ގަދަވާނެ ކަމަށް ލަފާ ކުރެވޭ ކަމަށެވެ.
މިދުވަސްވަރު ރާއްޖެއަށް ވިއްސާރަކޮށް ބައެއް ދުވަސްތަކު އެކި ސަރަހައްދުތަކަށް މޫސުން ވަރަށް ބޮޑަށް ގޯސްވަމުން އަންނަކަން ފާހަގަ ކޮށްލެވެއެވެ.
އެގޮތުން މޫސުމާއި ބެހޭ ޤައުމީ އިދާރާއިން ރޭ ވަނީ ރާއްޖޭގެ ދެކުނުގެ އަތޮޅުތަކަށް ރީނދޫ ސަމާލު ވެސް ނެރެފައެވެ.
