މިދިޔަ ސެޕްޓެމްބަރު މަހުގެ 10 ވަނަ ދުވަހު ނ. ހޮޅުދޫ ގެއެއްގެ ތެރޭގައި ބޮޑެތި ޒަޚަމްތަކަކާއެކު މަރުވެފައި އޮއްވައި ފެނުނު އުމުރުން 50 އަހަރުގެ ޒަކިއްޔާ މޫސާގެ މަރުގައި އެއްވެސް މީހެއްގެ އަތެއް ވާކަމުގެ އެއްވެސް ހެއްކެއް މިހާތަނަށް ތަޙުޤީގަށް އެނގިފައި ނުވާކަމުގައު ފުލުހުން ބުނެފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓާ އޮފް ޕޮލިސް މުހައްމަދު ސާމިހު ވިދާޅުވީ، ޒަކިއްޔާ މަރުވެފައިވަނީ އޭނާގެ ކަރަށް ލިބިފައިވާ ޒަޚަމްތަކުގެ ސަބަބުންކަން ޑޮކްޓަރުގެ ލިޔެކިޔުންތަކުން އެނގޭ ކަމަށެވެ.
އެހެން ނަމަވެސް އެ ޒަޚަމްތަކަކީ އެހެން މީހެއްގެ ފުށުން ލިބިފައިވާ ޒަޚަމްތަކެއްކަން މިހާތަނަށް ކުރިއަށް ގެންދިޔަ ތަޙުޤީގުތަކުން އެނގެން ނެތްކަމުގައި ސާމިހު ވިދާޅުވިއެވެ.
ސާމިހު ވިދާޅުވީ އެ މައްސަލާގައި ޒަކިއްޔާގެ ހަށިގަނޑު ބެލި ބެލުމުން ތޫނު އެއްޗަކުން އޭނާގެ ކަރުގެ ކަނާތް އަދި ވައަތް ފަރާތަށް ފުންކޮށް ގިނަ ޒަޚަމްތަކެއް ލިބިފައި ހުރިކަމަށެވެ. އަދި ކަރުގައި މެދާއި ހިސާބުގައި ތިލަކޮށް އެއް ޒަޚަމް ލިބިފައި ހުރި ކަމަށް ސާމިހު ވިދާޅުވިއެވެ. އަދި ޑޮކްޓަރުގެ ބަހުން އެ ޒަޚަމްތަކަކީ “ހެސިޓޭޝަން” މާކުތަކެއްކަން ވެސް އެނގޭކަމަށް ސާމިހު ވަނީ ވިދާޅުވެފައެވެ.
މީގެ އިތުރުން އޭނާގެ ކަރަށް ލިބިފައިވާ ޒަޚަމްތަކަކީ އޭނާ މަރުވެފައި އޮތް އިރު ކައިރީގައި އޮތް ވަޅިން ލިބިފައިވާ ޒަޚަމްތަކެއްތޯ ނުވަތަ ނޫންތޯ އެނގޭނީ މުޅި ތަޙުޤީގު އެއްކޮށް ނިމުމުންކަމުގައިވެސް ފުލުހުން ވަނީ ބުނެފައެވެ.
އަދިވެސް އެ މައްސަލައިގެ ތަހުގީގު ކުރިއަށްދާ ކަމަށާއި ބައެއް ކަންތައްތައް ނިންމުމަށް ވަގުތު ނަގާނެ ކަމަށް ސާމިހު ވިދާޅުވިއެވެ.
ޒަކިއްޔާ މަރުވި ދުވަހު މާލޭން އެ މަރުގެ ތަހުގީގަށް ފުލުހުންގެ ޓީމެއް އެ ރަށަށް ދިޔައެވެ. ޒަކިއްޔާގެ މަރަށް ދެ މަހަށް ވުރެ ގިނަދުވަސްވެ ތަޙުޤީގު ލަސްވަމުން ދާތީ އެކަމާއި ކަންބޮޑުވުން ފާޅުކޮށް ހޮޅުދޫގެ ރައްޔިތުން މި ފަހުން ވަނީ އެއްވުމެއް ވެސް ބާއްވައިފައެވެ.
އެ އެއްވުމުގައި ހޮޅުދޫގެ ރައްޔިތުން ވަނީ ޒަކިއްޔާ މަރުވީ އަމިއްލައަކަށް ނޫން ކަމަށް ބުނެ ތަޙުޤީގު އަވަސް ކުރަން ގޮވާލާފައެވެ.
