މި ދުވަސްވަރަކީ ރާއްޖޭގެ ވައި ނުސާފު ދުވަސްވަރެއްކަމުން އެކަމަށް ސަމާލުވުމަށް އެޗްޕީއޭއިން އިލްތިމާސްކޮށްފިއެވެ.
އެ އިދާރާއިން މިއަދު ބުނެފައިވަނީ، ވައި ނުސާފު ވަގުތުތަކުގައި ބޭރުގައި އުޅޭ އިރު އެކަމަށް ސަމާލުވުމަށާއި ޚާއްސަކޮށް ފުއްޕާމޭގެ ބަލިތަކާއި ހިތުގެ ބަލި، އެލާޖީ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަ ނުކުރުމަށާއި، ބޭރަށް ނުކުންނަން ޖެހޭ ހާލަތްތަކުގެ ރައްކާތެރި މާސްކު އެޅުމަށެވެ.
މީގެ އިތުރުން ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ބޭރުގައި ގިނަވަގުތު ހޭދަނުކުރުމަށާއި ތުއްތު ކުދިން ވައި ނުސާފު ވަގުތުތަކުގައި ބޭރަށް ނުނެރުމަށް އެޗްޕީއޭއިން އިލްތިމާސްކުރެއެވެ.
ހަމަ އެޔާއެކު އެޗްޕީއޭއިން ވަނީ، ވައި ނުސާފު ވަގުތުތަކުގައި ގޭގެ ދޮރުތައް ލައްޕައި، ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންކަން މަޑުޖައްސާލުމަށްވެސް އިލްތިމާސްކޮށްފައެވެ.
ރާއްޖެއަށް ވައި ނުސާފުވެފައި ވަނީ އުތުރު އިންޑިއާގެ ވައި ތަޣައްޔަރުވުމުގެ ސަބަބުންނެވެ. މިއީ އާންމުކޮށް ކޮންމެ އަހަރެއްގެވެސް ޑިސެމްބަރު މަހާއި ދިމާކޮށް ރާއްޖެއަށް ކުރިމަތިވާ ކަމެކެވެ.
އެގޮތުން ޖައްވުގެ ނުސާފުކަން އަންދާޒާކުރާ ނިޒާމު “އައިކިއު އެއާ” އިން ދައްކާ ގޮތުގައި، އިއްޔެ މެންދުރު މާލޭގެ ވައިގެ ކޮލިޓީ ހުރީ 94 ގައެވެ. އެއީ މޮޑަރޭޓް ލެވަލްއެވެ. އެކަމަކު، މާލެއާ ކައިރީގައި އޮންނަ ވިލިމާލޭގެ ވައިގެ ކޮލިޓީ ހުރީ 139 ގައެވެ. އެއީ ސިއްހަތަށް ނުރައްކާވާ މިންވަރެކެވެ. އެ މިންވަރުގައި ހުންނަ ނަމަ ހައި ރިސްކް މީހުން ހާއްސަ ސަމާލުކަމެއް ދޭން ޖެހޭނެއެވެ.
