ދުންފަތާއި ދުރުވުމަށް ބޭނުންވާ ފަރާތްތަކަށް ޤައުމީ ފެންވަރުގައި އެހީތެރިވުމުގެ ގޮތުން ސަރުކާރުން ކުރުމަށް ނިންމާފައިވާ ކަންތަައްތަކުގެ ތެރޭގައި ހިމެނޭ ދުންފަތާ ދުރުވާން ބޭނުންވާ މީހުންނަށް ބޭނުންވާ އެހީތެރިކަން ފޯރުކޮށްދޭ ހޮޓްލައިންގެ ޚިދުމަތް މިއަދު ފަށައިފިއެވެ.
އެ ޚިދުމަތް ހޯދުމަށް ގުޅާނެ ނަމްބަރަކީ 1676 އެވެ.
މި ޚިދުމަތް ފެށިގެން އިއުލާނުކޮށް ލްތު ޕްރޮޓެކްޝަން އޭޖެންސީ (އެޗްޕީއޭ)އިން މިއަދު އެކްސްގައި ކުރި ޕޯސްޓެއްގައި ބުނެފައި ވަނީ، ދުންފަތާއި ދުރުވުމަށް ކަމުގެ ތަޖުރިބާކާރުންގެ އެހީތެރިކަން އެ ހޮޓްލައިނުން 24 ގަޑިއިރު ލބެން ހުންނާނެ ކަމަށެވެ.
މި ހޮޓްލައިން އިފްތިތާޙް ކުރުމަށް ކެބިނެޓުން ނިންމިކަން އިއުލާނުކުރައްވައި ހެލްތު މިނިސްޓަރު އަބްދުﷲ ނާޒިމް އިބްރާހީމް މިދިޔަ ހަފްތާގައި ވިދާޅުވީ، ދުންފަތުގެ އިސްތިއުމާލުކުރުމަށް އާދަވެފައިވާ ފަރާތްތަކަށް އެކަން ހުއްޓާލުމަށް ބޭނުންވާ އެހީތެރިކަން މުޅި ރާއްޖޭގައި ލިބޭނެހެން ސިޒޭޝަންގެ ޚިދުމަތް ޤާއިމްކުރުމަށް ކެބިނެޓުން ނިންމާފައިވާކަމަށެވެ.
މިދިޔަ މަހުގެ 15 އިން ފެށިގެން ވަނީ އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުންކުރާ އެފަދަ އާލާތްތައް ރާއްޖެ އެތެރެކުރުން މަނާކޮށްފައެވެ. އަދި ވޭޕް ބޭނުންކުރުން އަންނަ އާދިއްތަ ދުވަހުން ފެށިގެން މަނާވާނެއެވެ.
މި ސަރުކާރުން ދުންފަތާ ދެކޮޅަށް ކުރަމުންދާ މަސައްކަތްތަކުގެ ތެރެއިން ސިނގިރޭޓުގެ އިމްޕޯޓް ޑިއުޓީ ވެސް ވަނީ ބޮޑުކޮށްފައެވެ. އެއާއެކު ސިނގިރޭޓުގެ އަގު ވަނީ ވަރަށް ބޮޑު އުފުލިފައެވެ.
