ހައުސިންގް ޑިވެލޮޕްމަންޓް ކޯޕަރޭޝަން، (އެޗްޑީސީ) ގެ މެނޭޖިން ޑިރެކްޓަރުގެ މަޤާމުން އިބްރާހިމް ފަޒުލް ރަޝީދު ދެންމެ އިސްތިއުފާ ދެއްވައިފިއެވެ.
އެ މަޤާމުން އިސްތިއުފާދެއްވައި ރައީސަށް ފޮނުވި ސިޓީއެއްގައި ފަޒުލް ވިދާޅުވީ،އެޗްޑީސީގެ މެނޭޖިން ޑިރެކްޓަރު ކަމުގައި ހޭދަކުރެއްވި މުއްދަތުގައި އޭނާއާ މެދުގައި އެކި ގޮތް ގޮތުން ކުރި އަދި މިހާރު އެކިއެކި ޕްލެޓްފޯމްތަކުގައި ކުރަމުންދާ ތުހުމަތުތަކަށް އިންކާރު ކުރައްވައިފައެވެ.
އެގޮތުން އެ މަޤާމުގައި ހޭދަކުރެއްވި މުއްދަތުގައި ކުރެއްވި އެންމެހާ ކަންތަކަކީވެސް ކުންފުނީގެ އުސޫލުތަކާއި އެއްގޮތަށް ކުރި ކަންކަން ކަމުގައި ފަޒުލްގެ ސިޓީގައި ވިދާޅުވެފައިވެއެވެ.
އަދި “ބިންވެރިޔާ” ސްކީމާ ގުޅިގެން ކުންފުންޏަށް އަމާޒުވެފައިވާ ތުހުމަތުތަކަކީ ކުންފުންޏާ އެއްވެސް ގުޅުމެއް ހުރި ކަންތައްތަކެއް ނޫން ކަމަށް ފަޒުލް ވިދާޅުވިއެވެ.
އެގޮތުން ފަޒުލް ވިދާޅުވީ އެޗްޑީސީގެ މެނޭޖިން ޑިރެކްޓަރު ކަމުގެ މަގާމުން އިސްތިއުފާ ދެއްވީ “ބިންވެރިޔާ” ސްކީމާ ގުޅިގެން މިހާރު ކުރިއަށްދާ ތަހުގީގަށް ފުރުސަތު ދިނުމަށާއި ކުންފުންޏާއި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމަށް ފުރުސަތު ދިނުމުގެ ގޮތުން ކަމަށެވެ.
އެ މަޤާމުން އިސްތިއުފާދެއްވި އިރު ފަޒުލް ހުންނެވީ ބިންވެރިޔާ ގޯތީގެ މައްސަލައިގައި ސަސްޕެންޝަނެއްގައެވެ.
އަދި މައްސަލައިގެ ތަޙުޤީގާއި ގުޅިގެން ފަޒުލްގެ ޕާސްޕޯޓްވެސް އޮތީ ހިފަހައްޓައިފައެވެ.
