ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ހުސްވެފައިވާ އެމްޑީކަމުގެ މަޤާމަށް ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލް އައްޔަން ކުރައްވައިފިއެވެ.
އެޗްޑީސީގެ އެމްޑީގެ މަޤާމު ހުސްވެފައިވަނީ ގެދޮރުވެރިޔާ ސްކީމްގެ ދަށުން ދޮގު ލިޔެކިޔުންތަކެއް އުފައްދައިގެން ގޯއްޗަށް ޝަރުތު ހަމަނުވާ ބަޔަކަށް އެޗްޑީސީން ގޯތި ދިންކަމުގެ މައްސަލައެއް ފެންމަތިވެ އެ މައްސަަލައިގެ ތަޙުޤީގަށް އެ ކުންފުނީގެ އެމްޑީކަމުން އިބްރާހިމް ފަޒުލް ރަޝީދު އިސްތިއުފާ ދެއްވުމާއި ގުޅިގެންނެވެ.
އެޗްޑީސީގެ އެމްޑީއަކަށް އަލަށް އައްޔަންކުރެއްވި މައުރޫފް ޖަމީލަކީ، ކުރީގެ ރައީސް މައުމޫނު އަބްދުލްގައްޔޫމުގެ ވެރިކަމުގައި މިނިސްޓާ އޮފް ކޮންސްޓްރަކްޝަން އެންޑް ޕަބްލިކް އިންފްރާސްޓްރަކްޗާގެ މަގާމު ފުރުއްވި ބޭފުޅެކެވެ. އަދި މޯލްޑިވްސް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ) ސްޕެޝަލް އެޑްވައިޒަރު ކަން ވެސް ކުރެއްވި ބޭފުޅެކެވެ. ޑިޒައިން ކުރެއްވުމުގައި ވެސް ކުޅަދާނެ މައުރޫފް މީގެކުރިން ވަނީ ސަރުކާރުން ދިން ހާއްސަ އިނާމް، ޑިޒައިން އެނަޖީ އެފިޝަންސީ އެވޯޑް ވެސް ލިބިވަޑައިގެންފައެވެ.
