މި މަހުގެ 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރުގައި ރަށްވެހިވެފައިވާ ތަން ނޫން އެހެން ތަނަކަށް ވޯޓު ލާން ރީ-ރަޖިސްޓްރީ ކުރަން މިހާތަނަށް 25،000 އަށް ވުރެ ގިނަ ފޯމު ހުށަހަޅާފައިވާ ކަމަށް އީސީން ބުނުމާ ގުޅިގެން، އިދިކޮޅު ކެންޑިޑޭޓު ޑރ. މުހައްމަދު މުއިއްޒު އެކަމާ ސުވާލު އުފައްދައިފި އެވެ.
މުއިއްޒު މިއަދު ކުރެއްވި ޓްވީޓެއްގައި ވިދާޅުވީ، މި އަދަދާމެދު ސުވާލު އުފެދޭ ކަމަށާއި މިއީ އިންތިހާބު މޮނިޓާ ކުރާ ފަރާތްތަކާއި ސިޔާސީ ޕާޓީތަކުން ވަރަށް ސީރިއަސްކޮށް ބަލަން ޖެހޭ ކަމެއް ކަމަށެވެ.
އީސީން މިއަދު ބުނި ގޮތުގައި، 25،493 މީހުން ރީ-ރަޖިސްޓްރީ ވާން ހުށަހެޅިއިރު، އޭގެ ތެރޭގައި ގިނައީ އޮންލައިންކޮށް ހުށަހެޅި ފޯމުތަކެވެ. މިހާތަނަށް ހުށަހެޅި ފޯމު ތަކުގެ ތެރެއިން، 10،271 މީހުން ރީ-ރަޖިސްޓްރީ ކޮށްދީފައިވާއިރު، އެކިއެކި ސަބަބުތަކާ ހުރެ، 1،546 ފޯމު ވަނީ ރިޖެކްޓުކޮށްފަ އެވެ.
