ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރުމަށް އެމްޑީޕީން ގަރާރު ހުށަހެޅީ ގަވައިދާ ހިލާފަށް ބުނެ، އެމަނިކުފާނު ތަމްސީލުކުރައްވާ ޑިމޮކްރެޓުން ނިޒާމީ މައްސަލަ ހުށަހެޅުމުން، މަޖިލީހުގެ ޖަލްސާ ހޫނުވެއްޖެއެވެ.
މިއަދުގެ ޖަލްސާގެ ރިޔާސަތު ބަލަހައްޓަވަން ކަނޑައަޅުއްވާފައިވާ ނާއިބު ރައީސް އީވާ އަބްދުﷲ މަޖިލީހަށް ސަލާމް ފޮނުއްވާފައިވުމުން، ރިޔާސަތާ ހަވާލުވީ ވިލުފުށީ ދާއިރާގެ މެންބަރު ހަސަން އަފީފްއެވެ.
މަޖިލިސް ފެށުމާއެކު، މަޖިލީހަށް ހުށަހެޅި ގަރާރަކީ އެއީ މަޖިލީހުގެ ގަވައިދާ ހިލާފަށް ހުށަހަޅާފައިވާ ހުށަހެޅުމެއް ކަމަށް ބުނެ، ޑިމޮކްރެޓްސްއިން އެ ގަރާރު ބޭރުކޮށްލުމަށް ގޮވާލާފައެވެ. އަދި އެގަރާރަކީ އެއްވެސް ގޮތަކަށް މަޖިލީހަށް ހުށަހަޅަން ޖެހޭ ލިޔުންތައް ހުންނަން ޖެހޭ އޮނިގަނޑަށް ފެތިފައިވާ ގަރާރެއް ނޫން ކަމަށާއި މަޖިލީހުގެ ގަވައިދުގެ 169 ވަނަ މާއްދާގެ (ހ) ގައި މަޖިލީހަށް ހުށަހަޅާ ހުށަހެޅުންތަކާއި ގަރާރުތައް ހުންނަން ޖެހޭ ގޮތް ސާފުކޮށް ބަޔާން ކޮށްފައިވާ ކަމަށާއި އަދި މިމަހުގެ 9 ވަނަ ދުވަހު ސުޕްރީމް ކޯޓުން ކުރި ހުކުމުގައި ވެސް މަޖިލީހުގެ ގަވައިދަށް ބަލަން ޖެހޭ ކަމަށް ސާފުކޮށް ހުކުމް ކޮށްފައިވާ ކަމަށެވެ. ހުޅުދޫ ދާއިރާގެ މެމްބަރު އިލްޔާސް ލަބީބް ވަނީ ވިދާޅުވެފައެވެ.
ރައީސް ނަޝީދުގެ އިތުބާރު ނެތްކަމަށް ހުށައަޅާފައިވަނީ ގަރާރެއްތޯ ނުވަތަ ބިލެއްތޯ ނުވަތަ ކުއްލި މައްސަލައެއްތޯ ނުވަތަ ކޮމިޓީ ރިޕޯޓެއްތޯ ސާފު ނުވާކަމަށާއި މިޖަލްސާ ކުރިއަށް ދެވޭނީ މިއީ ކޯއްޗެއްކަން އިނގުނީމަކަމަށާއި ގަރާރެއްގެ ވަކި ސިފަތަކެއް ހުންނަންޖެހޭނެ ކަމަށް މަޖިލީހުގެ ގަވާއިދު ބަޔާންކުރާ ކަމަށް ޑިމޮކްރެޓްސްގެ ޕީޖީ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް ވަނީ ވިދާޅުވެފައެވެ.
“…މި ގަރާރުގައި އަޅުގަނޑަށް ނުފެނޭ ދީބާޖާއެއް އޮންނަންޖެހޭ ކަމަށް. އެ އޮތް ކަމަކަށް އަޅުގަނޑަކަށް ގައިމު ވެސް ނުފެނޭ،” އެ ނޫން ގޮތަކަށް ގަރާރު ކުރިއަށް ގެންދަން ފުރުސަތު ނުދޭނެކަން ފާހަގަކުރައްވަމުން އާޒިމް ވިދާޅުވި އެވެ.
މިނިޒާމާ ބެހޭ ނުކުތާއަށް ރައްދުގައި ނިޒާމީ ނުކުތާއެއް ނަންގަވައި، މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވީ އެއްވެސް އަސާސެއް ނެތް ވާހަކަތަކެއް ދައްކައިގެން، ސުޕްރީމް ކޯޓުގެ ހުކުމަށް ވެސް ގޮންޖަހައި، މަޖިލީހުގެ ރައީސް ކަމުގައި ނަޝީދު އިންނަވަން މަސައްކަތް ކުރައްވާ ކަމަށެވެ.
